އިޒްރާއީލުގެ ހަމަލާއަށް ޖަވާބުދާރީވުމަށް އިރާނުގެ ރޫހާނީ ލީޑަރު އަމުރުކުރައްވައިފި

އިޒްރާއީލުން އިރާނަށް ދިން ހަމަލާއަށް ޖަވާބުދާރީވުމަށް އިރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަމުރުކުރައްވައިފިއެވެ.

ނިއުޔޯކް ޓައިމްސްގެ ރިޕޯޓެއްގައި ބުނެފައިވާ ގޮތުގައި، އިޒްރާއީލުން ހޮނިހިރު ދުވަހު އިރާނަށް ދިން ހަމަލާއިން ލިބުނު ގެއްލުން "އަޅައިނުލާ ދޫކޮށްލެވޭ ވަރަށްވުރެ މާ ބޮޑު" ކަމަށް ނިންމަވައި، އިޒްރާއީލަށް ހަމަލާއެއް ދިނުމަށް ތައްޔާރުވުމަށް ނެޝަނަލް ސެކިއުރިޓީ ކައުންސިލަށް އާޔަތުﷲ ޚާމަނާއީ އަމުރުކުރައްވާފައިވެއެވެ.

އިރާނުގެ އޮފިޝަލުން ބުނާ ގޮތުގައި، އިރާނުގެ އަސްކަރީ ޤާބިލިއްޔަތަށް ލިބުނު ގެއްލުމުގެ ބޮޑުމިނަށް ބަލާއިރު، "ޖަވާބު ނުދިނުމަކީ ބަލިވުން ޤަބޫލުކުރުން" ކަމަށް އާޔަތުﷲ ޚާމަނާއީ ވިދާޅުވެފައިވެއެވެ. އިރާނުގެ އަސްކަރީ ލީޑަރުން މިހާރު އިޒްރާއީލުގެ އަސްކަރީ އަމާޒުތަކުގެ ލިސްޓެއް ތައްޔާރުކުރަމުންދާ ކަމަށް އޮފިޝަލުން ބުނެފައިވެއެވެ.

އިރާނުގެ ޤުދްސް ފޯސްގެ ކޮމާންޑަރު އިސްމާއީލް ޤާއާނީ ވިދާޅުވެފައިވަނީ، "އިރާނުން އެ ޤައުމުގެ އެކުވެރި ހިޒްބުއްﷲއާއެކު ދެމިއޮންނާނެ" ކަމަށެވެ. ހިޒްބުﷲއަކީ ލުބުނާންގައި ހަރަކާތްތެރިވާ އިޒްރާއީލާ ދެކޮޅަށް ހަނގުރާމަ ކުރަމުންދާ ޖަމާއަތެކެވެ.

އިޒްރާއީލުގެ ބޮޑުވަޒީރު ބެންޖަމިން ނެތަންޔާހޫ ބުނެފައިވަނީ އިރާނަށް ފަހުން ދިން ހަމަލާތަކުގެ ސަބަބުން، ދެވަނަ ބުރެއްގައި އިތުރު ގެއްލުންތަކެއް ދިނުމުގެ ފުރުސަތު އިޒްރާއީލަށް ލިބިފައިވާ ކަމަށެވެ. އިޒްރާއީލަށް މިހާރު އިރާނުގައި ޢަމަލުކުރުމުގެ މިނިވަންކަން ކުރިއަށްވުރެ މާ ބޮޑަށް ލިބިފައިވާ ކަމަށް އޭނާ ބުންޏެވެ.

އޮކްޓޯބަރު 1 ވަނަ ދުވަހު އިރާނުން އިޒްރާއީލަށް ދިން މިސައިލް ހަމަލާދިނީ ހިޒްބުﷲގެ ސެކްރެޓަރީ ޖެނެރަލް ހަސަން ނަސްރުﷲ އަވަހާރަކޮށްލުމާއި، ހަމާސްގެ ލީޑަރު އިސްމާއީލް ހަނިއްޔާ އަވަހާރަކޮށްލުމަށް އިޒްރާއީލުން ދިން ހަމަލާއަށް ރައްދު ދިނުމުގެ ގޮތުންނެވެ.