ނަސްރުގެ ދުވަހުގެ މައުރަޒު ރައީސް މުއިއްޒު ހުޅުވައިދެއްވައިފި

ނަސްރުގެ ދުވަހާ ގުޅިގެން ސިފައިން ބާއްވާ މައުރަޒު 2024 ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ހުޅުވައިދެއްވައިފި އެވެ.

ނޭޝަނަލް އާޓް ގެލަރީގައި މިމަހުގެ 9 ވަނަ ދުވަހުގެ ނިޔަލަށް ކުރިޔަށްދާ މި މައުރަޒުގައި 1988 ގެ ނޮވެމްބަރު 3 ގައި ދިވެހިރާއްޖެއަށް ދިން އުދުވާނީ ހަމަލާއާ ގުޅޭ 200 އަށްވުރެ ގިނަ ޑިސްޕްލޭ ހިމެނެ އެވެ.

މި މައުރަޒުން އުދުވާނީ ހަމަލާގައި ލިބުނު ގެއްލުންތަކާއި އެ ދުވަހު ނަސްރު ހޯދުމަށް ސިފައިން ދެއްކި ހިތްވަރު ފެނިގެންދާނެ އެވެ. އަދި ފޮޓޯގެ އިތުރުން ނަސްރުގެ ދުވަހު ބޭނުން ކުރި ބައެއް އަސްލު ހަތިޔާރު ވެސް މައުރަޒުގައި ހިމެނެ އެވެ.

މައުރަޒު ހުޅުވިފައި ހުންނާނީ ކޮންމެ ދުވަހެއްގެ ވެސް ހެނދުނު 9:00 އިން 12:00 އަށާއި، މެންދުރުފަހު 2:00 އިން 6:00 އަށް އަދި ރޭގަނޑު 8:00 އިން 10:00 އަށެވެ. ރައީސް އޮފީހުން ބުނީ މި މައުރަޒުގެ މައިގަނޑު ބޭނުމަކީ ނަސްރުގެ ދުވަހުގެ މައުލޫމާތު އަދުގެ ޖީލަށް ބުނެދިނުމެވެ.

މިއަހަރުގެ ނަސްރުގެ ދުވަހުގެ ހަރަކާތްތައް ފެށިގެން ދިޔައީ އިސްލާމީ މަރުކަޒުގައި ޖަމާއަތުގައި ކުރި ފަތިސް ނަމާދުންނެވެ. އޭގެ ފަހުން ރައީސުލްޖުމްހޫރިއްޔާގެ ދެކަނބަލުން ވަނީ 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު ޝަރަފުވެރިކޮށްދެއްވާފަ އެވެ.