ސިޔާސީ މުވައްޒަފުންގެ ތެރެއިން 248 މީހުން މަދުކޮށްފި

ރައީސް ޑރ. މުހައްމަދު މުއިއްޒު

ދައުލަތުގެ ހަރަދު ކުޑަކުރުމުގެ މަސައްކަތުގެ ދަށުން، އިއްޔެގެ ނިޔަލަށް 248 ސިޔާސީ މުވައްޒަފުން ވަކިކޮށްފައިވާ ކަމަށް ރައީސް އޮފީހުގެ ޗީފް ސްޕޯކްސްޕާސަން ހީނާ ވަލީދު ވިދާޅުވެއްޖެ އެވެ.

މިއީ ރައީސް މުހައްމަދު މުއިއްޒު މިދިޔަ މަހުގެ 15 ވަނަ ދުވަހު އިއުލާން ކުރެއްވި ގޮތަށް ދެ ހަފްތާގެ ތެރޭގައި 228 މުވައްޒަފުން ވަކިކުރުމަށް ނިންމެވި ނިންމެވުމަށްވުރެ 20 މުވައްޒަފުން އިތުރު އަދަދެކެވެ.

މީގެ އިތުރުން، ސިޔާސީ މުވައްޒަފުންގެ މަސައްކަތުގެ ފެންވަރު ބެލުމަށް އައު ނިޒާމެއް ގާއިމްކުރުމަށް ކެބިނެޓުން ނިންމާފައިވާ ކަމަށާއި، އެ ނިޒާމަށް ވަރަށް އަވަހަށް އަމަލުކުރަން ފަށާނެ ކަމަށް ވެސް ހީނާ ވިދާޅުވި އެވެ.

ސިޔާސީ މުވައްޒަފުން މަދުކުރުމާ ގުޅިގެން ދައުލަތުގެ ބަޖެޓުން މަހަކު 5.7 މިލިއަން ރުފިޔާ ސަލާމަތްވާނެ ކަމަށް ރައީސް ކުރިން ވިދާޅުވެފައިވެ އެވެ. މިއީ ގައުމުގެ މާލީ ހާލަތު ގޯސްވެ، ސަރުކާރުން ހަރަދު ކުޑަކުރުމުގެ ސިޔާސަތުތައް ތަންފީޒުކުރަމުންދާ ދަނޑިވަޅެއްގައި އެޅުނު މުހިންމު ފިޔަވަޅެކެވެ.

ނަމަވެސް، މިހާތަނަށް ސިޔާސީ މުވައްޒަފުންގެ އަދަދު މަދު ނުކުރާތީ ސަރުކާރަށް ބޮޑެތި ފާޑުކިޔުންތައް އަމާޒުވެފައިވެ އެވެ. އެހެންކަމުން، މިއީ އަމަލީ ސިފައެއްގައި މި ފިޔަވަޅު އަޅާ ތަން ފެނުނު ފުރަތަމަ ފަހަރު ކަމަށްވާތީ، ގިނަ ފަރާތްތަކުން މިކަމަށް މަރުހަބާ ކިޔާފައިވެ އެވެ.

ރައީސް ޑރ މުޙައްމަދު މުޢިއްޒު