ގާނޫނުލް އުގޫބާތަށް ގެނެވޭ އިސްލާހާއެކު ކޮރަޕްޝަނާ ދެކޮޅަށް މަސައްކަތްކުރުމަށް ފަސޭހަވާނެ: އިހުސާނު

ގާނޫނުލް އުގޫބާތަށް ގެންނަން ނިންމާފައިވާ އިސްލާހާ އެކު ދައުލަތުގެ ތެރޭގައި އޮތް ޒަމާންވީ ކޮރަޕްޝަނުގެ މައްސަލަ ހައްލުކުރެވޭނެ ކަމަށް ހޯމްލޭންޑު ސެކިޔުރިޓީ މިނިސްޓަރު އަލީ އިހުސާނު ވިދާޅުވެއްޖެއެވެ.

މިނިސްޓަރު އިހުސާނު މިހެން ވިދާޅުވެފައިވަނީ ރައީސް މުހައްމަދު މުއިއްޒު ރޭ ކުރެއްވި އިއުލާނަކާ ގުޅިގެން ކުރެއްވި އެކްސް ޕޯސްޓެއްގައެވެ.

ރައީސް މުއިއްޒު ވިދާޅުވެފައިވަނީ ރައީސާއި ވަޒީރުންނާއި ފަނޑިޔާރުންނާއި މަޖިލިސް މެންބަރުން ހިމެނޭހެން ދައުލަތުގެ މުވައްޒަފުންނާއި ކުރީގެ މުވައްޒަފުން ހޯދަމުންދާ ނުވަތަ ހޯދާފައިވާ ނުހައްގު މުއްސަނދިކަމުގެ މައްސަލަތައް ބެލުމަށް ފަސޭހަވާނެ ގޮތަށް ގާނޫނުލް އުގޫބާތަށް ބަދަލު ގެންނަން ނިންމާފައިވާ ކަމަށެވެ. މި އިސްލާހު ފެށޭ ހަފްތާގައި ރައްޔިތުންގެ މަޖިލީހަށް ހުށަހަޅާނެ ކަމަށްވެސް ރައީސް ވިދާޅުވެފައިވެއެވެ.

މިނިސްޓަރު އިހުސާނު ވިދާޅުވެފައިވަނީ މިހާރު ގާނޫނުލް އުގޫބާތު އޮންނަ ގޮތުން ކޮރަޕްޝަނާއި ނުހައްގު މުއްސަނދިކަމުގެ ވާހަކަ ދެއްކި ނަމަވެސް އެކަމުގެ ދައުވާ ނުކުރެވޭ ކަމަށެވެ. އަދި ރައީސް މުއިއްޒު ގެންނަވަން ނިންމެވި އިސްލާހަކީ ދައުލަތުގެ ތެރޭގައި އޮތް ޒަމާންވީ ކޮރަޕްޝަނުގެ މައްސަލަ ހައްލުކުރެވޭނެ އަދި އެ ނިޔަތާއި އަޒުމް ފެންނަ އިސްލާހެއް ކަމަށްވެސް އޭނާ ވިދާޅުވިއެވެ.

ރައީސް މުއިއްޒު ވިދާޅުވެފައިވަނީ ގާނޫނުލް އުގޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ދައުލަތުގެ އިސް މަގާމުތަކުގައި ތިބި ފަރާތްތަކުން ހޯދާފައިވާ ނުހައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ ކަމަށެވެ. މި އިސްލާހު ގެނައުމުން ދައުލަތުގެ އިދާރާތަކުގެ ތެރޭގައި އަށަގަނެފައިވާ ކޮރަޕްޝަނާއި ނުހައްގު މުއްސަނދިކަން ހޯދުމުގެ މައްސަލަތައް ތަހުގީގުކޮށް، ދައުވާކުރަން ހުރި ގޮންޖެހުންތައް ނައްތާލެވޭނެ ކަމަށްވެސް ރައީސް އުންމީދު ފާޅުކުރައްވާފައިވެއެވެ.