ކޮޕް29 ސަމިޓް ބޮއިކޮޓްކުރަން ޕަޕުއާ ނިއު ގިނީން ނިންމައިފި
ގިނަ ބަޔަކު ދެކޭ ގޮތުގައި ކޮޕް29 އަކީ ބޭކާރު ސަމިޓެއް
އަންނަ މަހު ބޭއްވުމަށް ހަމަޖެހިފައިވާ ކޮޕް29 ސަމިޓް ބޮއިކޮޓްކުރަން ޕަޕުއާ ނިއު ގިނީން ނިންމާފިއެވެ.
އެ ގައުމުގެ ފޮރިން މިނިސްޓަރު ޖަސްޓިން ޓީކާޗެންކޯ ވިދާޅުވެފައިވަނީ މޫސުމީ މައްސަލަތަކާ ގުޅޭ ގޮތުން ބާއްވާ މި ސަމިޓަކީ ވަގުތު ބޭކާރުވުން ނޫން ކަމެއް ވާ ތަނެއް ނޫން ކަމަށެވެ.
ޓީކާޗެންކޯ އިތުރަށް ވިދާޅުވެފައިވަނީ ޖައްވަށް ވިހަ ގޭސްތައް ބޭރުކޮށް ތަޣައްޔަރުކުރާ ބޮޑެތި ގައުމުތަކުން އެކައްޗެއް ކިޔައިގެން އެކުގައި މަސައްކަތްކުރަން ފަށަންދެން ސަމިޓް ބޮއިކޮޓްކުރަން ނިންމާފައިވާ ކަމަށެވެ. އޭނާ ފާހަގަކުރެއްވި ގޮތުގައި މޫސުމީ މައްސަލަތައް ހައްލުކުރުމަށް ބޮޑެތި ގައުމުތަކުން ވައުދުވެފައިވާ އެހީތައް މިހާރު ދަނީ ހަމައެކަނި ކޮންސަލްޓެންޓުންނަށެވެ.
ޕަޕުއާ ނިއު ގިނީއަކީ ދުނިޔޭގެ ތިން ވަނައަށް އެންމެ ބޮޑު ރެއިންފޮރެސްޓް އޮންނަ ތަނެވެ. އެހެންކަމުން އެއީ "ބިމުގެ ފުއްޕާމޭ" ގެ ގޮތުގައި ސިފަކުރެވެއެވެ. ނަމަވެސް މިއީ މޫސުމަށް އަންނަ ބަދަލުތަކުގެ ނުރައްކާ ވަރަށް ބޮޑު ތަނެއްގެ ގޮތުގައި ބެލެވިފައިވާ ގައުމެކެވެ.
ޓީކާޗެންކޯ ވިދާޅުވެފައިވަނީ ނަތީޖާއެއް ނުނެރެވި މިދިޔަ ތިން އަހަރު ތަކުރާރުކޮށް ދައްކާ މޮޅު ވާހަކަތައް ދެކެ މިހާރު ފޫހިވެފައިވާ ކަމަށެވެ. މިއީ އދ. އިން ބާއްވާ މޫސުމާ ބެހޭ މި ސަމިޓްގައި އާންމުކޮށް އަމާޒުވާ ފާޑުކިޔުމަކަށް ވެފައިވާ ކަމެކެވެ.
މި ނިންމުމާއި ގުޅިގެން ޕަޕުއާ ނިއު ގިނީ ވެފައި މިވަނީ މި ކަންކަމާ ގުޅުވައި ސަމިޓް ބޮއިކޮޓްކޮށް އެންމެ ފާޅުގައި ވާހަކަ ދެއްކި އެއް ގައުމަށެވެ.
ކޮމެންޓް