މިސް ޔުނިވާސްގައި ބައިވެރިވުމާމެދު ރައީސް މުޢިއްޒު ކަންބޮޑުވުން ފާޅުކުރައްވައިފި

ހަށިގަނޑު ހާމަކޮށްގެން ކުރާ މަސައްކަތަކުން ލިބޭ ހަޤީޤީ ރީތި ނަމެއް ނެތް ކަމަށް ރައީސް މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި މިވަނީ މެކްސިކޯގައި ބޭއްވޭ މިސް ޔުނިވާސް މުބާރާތުގައި ރާއްޖެ ތަމްސީލުކުރުމާ މެދު ސަރުކާރުން ކަންބޮޑުވުން ފާޅުކުރުމާ ގުޅިގެން އާންމުންގެ ފަރާތުން އައި ފާޑުކިޔުންތަކަށް ރައްދު ދެއްވަމުންނެވެ.

ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ފިރިހެނަކު ވިޔަސް އަދި އަންހެނަކު ވިޔަސް، މާތްﷲ ރުހިވޮޑިގެންނުވާ ގޮތަކަށް ހަށިގަނޑު ހާމަކޮށްގެން ކުރާ މަސައްކަތަކުން ނުވަތަ ބައިވެރިވާ ކުޅިވަރަކުން އެ މީހަކަށް ނުވަތަ ދީނާއި ޤައުމަށް ލިބޭނެ ހަޤީޤީ ރީތި ނަމެއް، އުފަލެއް އަދި ކާމިޔާބީއެއް ނެތް ކަމަށެވެ.

ކުރިން ޔޫތު މިނިސްޓްރީން ނެރުނު ބަޔާނުގައި ބުނެފައިވަނީ މިފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ ބަލައިގަންނާނެ ކަމެއް ނޫން ކަމަށެވެ. މިނިސްޓްރީން ފާހަގަކޮށްފައިވަނީ މިއީ ދިވެހިންގެ ދީނާއި އަޤީދާ އަދި ސަގާފަތާ ނުގުޅޭ ކަމެއް ކަމަށާއި، ދިވެހިން ޤަބޫލުކުރާ އާންމު އަޚްލާޤީ މިންގަނޑުތަކާއި އުސޫލުތަކާ ޚިލާފު ކަމެއް ކަމަށެވެ.

މި ބަޔާނާ ގުޅިގެން ގިނަ ބަޔަކު ވަނީ ސޯޝަލް މީޑިއާގައި ފާޑުކިޔާފައެވެ. ޚާއްޞަކޮށް 'މިސްޓަރ މޯލްޑިވްސް' މުބާރާތުގައި ފިރިހެނުން ލައިގެން ތިބޭ އަންނައުނާ ގުޅޭގޮތުން ވަނީ ވަރަށް ބޮޑަށް ފާޑުކިޔާފައެވެ.

މިއީ ރާއްޖޭގެ ތާރީޚުގައި ފުރަތަމަ ފަހަރަށް މިސް ޔުނިވާސް މުބާރާތުގައި ދިވެއްސަކު ބައިވެރިވާން މަސައްކަތްކުރި ފަހަރެވެ. ނަމަވެސް ސަރުކާރުން ވަނީ މިސް ޔުނިވާސްއަށް ދިވެއްސަކު ފޮނުވި ފަރާތުން އެ އިންތިޒާމު ހުއްޓާލުމަށް ގޮވާލާފައެވެ.