ބީއެމްއެލްގެ އެމްޑީގެ މަޤާމަށް މުޙައްމަދު ޝަރީފް އައްޔަންކޮށްފި

ގައުމީ ބޭންކް، ބޭންކް އޮފް މޯލްޑިވްސްގެ ހުސްވެފައިވާ މެނޭޖިން ޑިރެކްޓަރުގެ މަޤާމަށް އެކުންފުނީގެ ސީއީއޯ މުޙައްމަދު ޝަރީފް އައްޔަން ކުރަން އެ ބޭންކުގެ ހިއްސާދާރުން މިއަދު ރުހުން ދީފިއެވެ.

މި މަޤާމު ހުސްވެފައިވަނީ ކުރިން ބީއެމްއެލްގެ ސީއީއޯ އަދި އެމްޑީކަން ކުރެއްވި ކާލް ސްޓުމްކަ މިދިޔަ މަހުގެ 9 ވަނަ ދުވަހު މަޤާމުން އިސްތިއުފާ ދެއްވުމާ ގުޅިގެންނެވެ.

ބީއެމްއެލް އިން މިއަދު ބުނީ އެމްޑީގެ މަޤާމަށް މުޙައްމަދު ޝަރީފް އައްޔަނުކުރީ މިއަދު ބޭއްވި ޚާއްޞަ އާންމު ޖަލްސާއަށް ފަހު އޮތް ޑިރެކްޓަރުންގެ ބޯޑު ބައްދަލުވުމުގައި ކަމަށެވެ. ޚާއްޞަގޮތަކުން ބޭއްވި ހިއްސާދާރުންގެ އާންމު ޖަލްސާގައި ޝަރީފް ވަނީ ބޭންކުގެ ބޯޑަށް އައްޔަންކޮށްފައެވެ.

ބޭންކުގެ ސީއީއޯގެ މަޤާމާ ޝަރީފް ހަވާލުވެވަޑައިގެންފައި ވަނީ މިމަހުގެ 17 ގައެވެ. އޭނާ އަކީ ބީއެމްއެލްގެ ފުރަތަމަ ދިވެހި ސީއީއޯ އެވެ. ޝަރީފަކީ ބީއެމްއެލްގައި 25 އަހަރަށް ވުރެ ގިނަ ދުވަހު ޚިދުމަތް ކުރެއްވުމަށް ފަހު ޑެޕިއުޓީ ސީއީއޯގެ މަޤާމުގައި ހުންނެވި ބޭފުޅެކެވެ. އޭނާ ބޭންކާ ގުޅިވަޑައިގެންނެވީ 1995 ގައެވެ.

ޝަރީފް ވަނީ ޔުނިވަސިޓީ އޮފް މެންޗެސްޓާއިން މާލީ ދާއިރާއިން މާސްޓާޒް ޑިގްރީއެއް ހާސިލްކުރައްވައިފައެވެ. އޭގެ އިތުރުން ލަންޑަން ބިޒްނަސް ސްކޫލް އިން ސީއީއޯ އިންނާއި ސީނިއަރ އެގްޒެކެޓިވުންނަށް ފަރުމާކޮށްފައިވާ 'ސީނިއަރ އެގްޒެކެޓިވް ޕްރޮގްރާމް' ފޮގްރާމް' ފުރިހަމަ ކުރައްވާފައިވެއެވެ. އަދި އޭނާ ވަނީ 2018 އިން 2020 އަށް އޭޝިއަން ބޭންކާސް އެސޯސިއޭޝަންގެ ވައިސް ޗެއާމަންގެ މަޤާމު ވެސް އަދާކުރައްވާފައެވެ.