ކެނަޑާގައި ސިކުންގެ އެކްޓިވިސްޓަކު މަރާލި ކަމުގެ ތުހުމަތު އިންޑިއާގެ ވަޒީރަކަށް

ކެނެޑާގައި ސިކު އެކްޓިވިސްޓް ހަރުދީޕް ސިންގް ނިޖާރް މަރާލި މައްސަލައިގައި އިންޑިއާގެ ބޮޑު ވަޒީރު ނަރެންދްރާ މޯދީގެ އަރިސް ވަޒީރަކަށް ކެނެޑާއިން ތުހުމަތުކޮށްފިއެވެ.

ކެނެޑާގެ ޚާރިޖީ ވަޒީރު ޑޭވިޑް މޮރިސަން ވިދާޅުވެފައިވަނީ އިންޑިއާގެ ކެބިނެޓް ވަޒީރަކު ކެނެޑާގެ ރައްޔިތުންގެ ޖާސޫސީ މައުލޫމާތު އެއްކުރުމުގެ އޮޕަރޭޝަންތައް ހިންގުމަށް އަމުރުކުރި ކަމަށެވެ.

ކެނެޑާގެ ބޮޑު ވަޒީރުގެ ގައުމީ ސަލާމަތާ ބެހޭ މުޝީރު ނަތަލީ ޑްރޮއިން ވިދާޅުވެފައިވަނީ އިންޑިއާ ސަރުކާރުން ކެނެޑާގައި ތިބި އިންޑިއާގެ ރައްޔިތުންނާއި ކެނެޑާގެ ރައްޔިތުންނާ ބެހޭ މައުލޫމާތު އެއްކުރި ހެކިތައް ކެނެޑާއަށް ލިބިފައިވާ ކަމަށެވެ. އަދި މި މައުލޫމާތު އިންޑިއާ ސަރުކާރަށް ފޯރުކޮށްދިނީ ލޯރެންސް ބިޝްނޯއީއާ ގުޅުން ހުރި ޖިނާއީ ނެޓްވޯކަކާ ގުޅިގެން ކަމަށް ތުހުމަތުކުރެވޭ ކަމަށްވެސް އޭނާ ވިދާޅުވިއެވެ.

މި މައްސަލައާ ގުޅިގެން ކެނެޑާއިން ވަނީ އިންޑިއާގެ ހައިކޮމިޝަނަރާއި އިތުރު ފަސް ޑިޕްލޮމެޓުން ވަކިކޮށްފައެވެ. އިންޑިއާ ސަރުކާރުން ވަނީ މި ތުހުމަތުތައް ދޮގުކޮށް، ކެނެޑާގައި ތިބި އެ ގައުމުގެ ހަ ޑިޕްލޮމެޓުން އަނބުރާ ގައުމަށް ގެނެސްފައެވެ.

ނިޖާރަކީ ސިކުންނަށް ވަކި ދައުލަތެއް އުފައްދަން ހިންގާ "ޚާލިސްތާން" ކެމްޕެއިނަށް ތާއީދުކުރާ ސިކުންގެ މީހެކެވެ. އޭނާ މަރާލާފައިވަނީ މިދިޔަ އަހަރު ޖޫން މަހު ސިކުންގެ ފައްޅިއެއްގެ ބޭރުގައެވެ. އެކަމުގެ އަޑީގައި ތިބީ އިންޑިއާގެ ޖާސޫސުން ކަމަށް ކެނެޑާއިން ތުހުމަތުކުރެއެވެ.

މި މައްސަލައިގެ ތަހުގީގަށްފަހު ހާމަކުރި ކަންކަމާ ގުޅިގެން އިންޑިއާއާއި ކެނެޑާގެ ގުޅުން ވަނީ ގޯސްވެފައެވެ. މި މައްސަލައާ ގުޅިގެން ދެ ގައުމުގެ މެދުގައި ޑިޕްލޮމެޓިކް ހަރުކަށިކަން އިތުރުވެ، ސިޔާސީ ގުޅުންތަކަށް އަސަރުކޮށްފައިވާކަން ފާހަގަކުރެވެއެވެ.