ނަޕޯލީން މިލާން ބަލިކޮށް ލީގުގެ ލީޑު ފުޅާކޮށްފި

ނަޕޯލީއަށް ރޭ ވަނީ މުހިއްމު މޮޅެއް ލިބިފައި

އިޓާލިއަން ސީރީ އޭ ލީގުގައި ނަޕޯލީން އޭސީ މިލާން 2-0 އިން ބަލިކޮށް، ލީގުގެ އެއްވަނައިގައި އޮތް ލީޑު ހަތް ޕޮއިންޓަށް ފުޅާކޮށްފިއެވެ.

މި މޮޅާއެކު ނަޕޯލީއަށް ވަނީ 10 މެޗުން 25 ޕޮއިންޓް ލިބިފައެވެ. ދެވަނައިގައި އޮތް އިންޓަ މިލާނަށް ނުވަ މެޗުން 18 ޕޮއިންޓް ލިބިފައިވާއިރު، އިންޓަ މިރޭ އެމްޕޮލީއާ ކުޅޭނެއެވެ.

ރަށުން ބޭރުގައި ކުޅުނު ނަމަވެސް ނަޕޯލީން މެޗު ފެށީ ވަރަށް ރަނގަޅަށެވެ. މެޗުގެ ފަސްވަނަ މިނެޓުގައި ޒަމްބޯ އަންގީސާ ދިން ބޯޅައަކުން ރޮމެލޫ ލުކާކޫ ވަނީ ނަޕޯލީއަށް ލީޑު ނަގައިދީފައެވެ. ފުރަތަމަ ހާފު ނިމުމުގެ ކުރިން ނަޕޯލީއަށް ދެވަނަ ލަނޑު ޖަހައިދިނީ އާރްމީނިއާގެ މިޑްފީލްޑަރު ކްވިޗާ ކްރަވަޝްކޭލިއާއެވެ.

މިލާނުން ބޯޅަ ހިފަހައްޓައިގެން ކުޅެ، ގޯލެއް ޖަހައި އެއްވަރުކުރެވޭތޯ ބެލި ނަމަވެސް ކާމިޔާބެއް ނުވިއެވެ. ދެވަނަ ހާފު ފެށުނުތަނާ މިލާންގެ އަލްވާރޯ މޮރާޓާ ވަނީ ބޮލުން ގޯލެއް ޖަހާފައެވެ. ނަމަވެސް، ވީޑިއޯ އެސިސްޓަންޓް ރެފްރީެފްރީ (ވީއޭއާރު) އިން ބެލުމަށްފަހު މި ގޯލު ވަނީ އޮފްސައިޑް ކަމަށް ނިންމާފައެވެ.

ނުވަ މެޗުން 14 ޕޮއިންޓާއެކު، މިލާން މިހާރު އޮތީ ލީގުގެ އަށްވަނައިގައެވެ. މިލާންގެ މި ހަފުތާގެ ފުރަތަމަ މެޗު ވިއްސާރައިގެ ސަބަބުން ނުކުޅެވުނެވެ.

ރޭގެ މި މޮޅާއެކު ނަޕޯލީ ވަނީ ލީގުގެ ޗެމްޕިއަންކަން ހޯދުމުގެ ފުރުސަތު އިތުރަށް ފުޅާކޮށްފައެވެ.

އިޓާލިއަން ސީރީ އޭ ލީގު