ކޮރަޕްޝަން މައްސަލައަކާ ގުޅިގެން ފެނަކައިގެ ކުރީގެ އެމްޑީގެ ޕާސްޕޯޓު ހިފަހައްޓައިފި

ފެނަކައިގެ ކުރީގެ މެނޭޖިން ޑިރެކްޓަރު އަހްމަދު ސައީދު

އެންޓި ކޮރަޕްޝަން ކޮމިޝަން (އޭސީސީ)އިން ބަލަމުންދާ ކޮރަޕްޝަނުގެ މައްސަލައަކާ ގުޅިގެން ފެނަކަ ކޯޕަރޭޝަނުގެ ކުރީގެ މެނޭޖިން ޑިރެކްޓަރު އަހްމަދު ސައީދުގެ ޕާސްޕޯޓު މި މަހުގެ 9 ވަނަ ދުވަހު ހިފަހައްޓައިފިއެވެ.

މިކަން އޭސީސީގެ އޮފިޝަލަކު ވަނީ ކަށަވަރުކޮށްދީފައެވެ.

ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ފެނަކައިގައި ކޮރަޕްޝަންގެ ބޮޑެތި އަމަލުތަކެއް ހިންގާފައިވާ ކަމަށް ތުހުމަތުކޮށް، އެ މައްސަލަތައް މި ސަރުކާރުން ވަނީ އޭސީސީއަށް ހުށަހަޅައިފައެވެ. ފެނަކައިގެ ކުރީގެ މެނޭޖްމަންޓާ ގުޅޭ ކޮރަޕްޝަނުގެ 25 މައްސަލައެއް އޭސީސީއަށް ހުށަހަޅާފައިވާ ކަމަށް، އެ ކުންފުނީގެ މިހާރުގެ އެމްޑީ، މުއާޒް މުހައްމަދު ރަޝީދު ވަނީ މިދިޔަ އޮގަސްޓުމަހު ވިދާޅުވެފައެވެ.

މި ސަރުކާރުން ވެރިކަމާ ހަވާލުވީ ފެނަކައަކީ "ކޮރަޕްޝަންގެ ހާއްޔެއް"ގެ ގޮތުގައި ސިފަކުރަމުންނެވެ. އަދި އެ ކުންފުނި އޮތީ 1.7 ބިލިއަން ރުފިޔާއިން ދަރުވާލާފައި ކަމަށް ފެނަކައިން ވަނީ މީގެ ކުރިން ބުނެފައެވެ.

ނަމަވެސް މި ވެރިކަމަށް ހަތް މަސް ދުވަސްތެރޭ ފެނަކައިގެ ދަރަނީގެ ގޮތުގައި ހުރި ފައިސާގެ ތެރެއިން 300 މިލިއަން ރުފިޔާ ދައްކައިފައިވާ ކަމަށާއި، މި އަހަރުގެ ދެވަނަ ކުއާޓަރުގައި ހަތް މިލިއަން ރުފިޔާގެ ފައިދާއެއް ވެފައިވާ ކަމަށް ވެސް ފެނަކައިން ބުނެފައިވެއެވެ.

ފެނަކަ