މާލެ ސަރަހައްދުގެ ޓެކްސީ ޚިދުމަތް ދެ ހަފުތާތެރޭ ސަރުކާރު ކުންފުންޏަކާ ހަވާލުކުރަނީ

މާލެ ސަރަހައްދުގައި ޓެކްސީ ޚިދުމަތް ދިނުމަށް ކުރިއަށް އޮތް ދެ ހަފްތާގެ ތެރޭގައި ސަރުކާރު ހިއްސާވާ ކުންފުންޏަކާ ހަވާލުކޮށް އެކަން އިއުލާނު ކުރާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން މިއަދު ވިދާޅުވެއްޖެއެވެ.

މިނިސްޓަރު މިހެން ވިދާޅުވީ ރައްޔިތުންގެ މަޖިލީހުގެ އިގްތިސާދީ ކޮމިޓީއަށް ހާޒިރުވެވަޑައިގެން ވާހަކަ ދައްކަވަމުންނެވެ.

މާލެ ފެހި ޕްރޮގްރާމްގެ ދަށުން ތައާރަފްކުރާ މި އައު ޓެކްސީ ލައިން ހިންގާނީ އެމްޓީސީސީން ހިންގާ އާރްޓީއެލް ބަހުގެ ޚިދުމަތާ އެއްގޮތަށް ކަމަށް މިނިސްޓަރު ވިދާޅުވިއެވެ. މި ޚިދުމަތުގައި މުވައްޒަފުންގެ 50 ޕަސަންޓަކީ ދާއިމީ މުވައްޒަފުން ކަމަށާއި، ބާކީ 50 ޕަސަންޓަކީ އެކި ގަޑިތަކުގައި ޓެކްސީ ދުއްވަން ބޭނުންވާ ފަރާތްތަކަށް ދޫކުރާނެ ސްލޮޓްތަކެއް ކަމަށް އަމީން ވިދާޅުވިއެވެ.

ޑްރައިވަރުންނަށް ގަޑިއިރަކަށް ދޭ އަގު 100 ރުފިޔާއަށްވުރެ ދަށްނުވާނެ ކަމަށާއި، ކޮންމެ ހަފުތާއަކު މުސާރަ ދޭގޮތަށް ހަމަޖައްސާފައިވާ ކަމަށް މިނިސްޓަރު ވިދާޅުވިއެވެ. އަދި ޑްރައިވަރުންގެ ޑްރެސްކޯޑެއް އޮންނާނެ ކަމަށާއި، ބިދޭސީންނަކަށް މި ޚިދުމަތުގައި މަސައްކަތެއް ނުކުރެވޭނެ ކަމަށްވެސް އޭނާ ވިދާޅުވިއެވެ.

މިނިސްޓަރު އިތުރަށް ވިދާޅުވީ މި ޓެކްސީ ލައިންގައި މަސައްކަތްކުރާ ޑްރައިވަރުންނާއި ޚިދުމަތް ބޭނުންކުރާ ފަރާތްތަކުގެ ރައްކާތެރިކަން ކަށަވަރުކުރެވޭނެ ކަމަށާއި، ކޮމްޕިއުޓަރައިޒްޑް ސިސްޓަމަކުން މޮނިޓަރކުރެވޭނެ ކަމަށެވެ. މި ޚިދުމަތް 24 ގަޑިއިރު ލިބެން ހުންނާނެ ކަމަށާއި، ޓެކްސީތަކުގެ މަދުވެގެން 25 ޕަސަންޓަކީ އިލެކްޓްރިކް އުޅަނދުތަކަށް ހެދުމަށް ނިންމާފައިވާ ކަމަށްވެސް މިނިސްޓަރު ވިދާޅުވިއެވެ.