މުއައްސަސާތަކުގެ ބާރު ރައީސަށް ލިބިގެން ނޫނީ ޤައުމު އިޞްލާޙެއް ނުކުރެވޭނެ: މެމްބަރ ސަލީމް

ޤައުމުގައި ހިނގާ ޚިޔާނާތާއި ފަސާދަ ހުއްޓުވައި ޤައުމު އިޞްލާޙު ކުރެވޭނީ މިނިވަން މުއައްސަސާތަކުގެ ބާރު ރައީސުލްޖުމްހޫރިއްޔާއަށް ލިބިގެން ކަމަށް އޭދަފުށީ ދާއިރާގެ މެންބަރު އަޙްމަދު ސަލީމް ވިދާޅުވެއްޖެއެވެ..

ސަލީމް މިފަދައިން ވިދާޅުވީ އެންޓި-ކޮރަޕްޝަން ކޮމިޝަން (އޭސީސީ)ގެ ރައީސާއި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދޭ ގޮތަށް ސަރުކާރުން ހުށަހެޅި އިޞްލާޙަށް ބަހުސްކުރައްވަމުންނެވެ.

ސަލީމް ވިދާޅުވީ ރައީސުލްޖުމްހޫރިއްޔާއަށް ބާރުތައް ދީގެން ނޫނީ ޤައުމުގެ އެއްވެސް ކަމެއް އިޞްލާޙު ނުވާކަން ސާފުކޮށް ފެންނަން އެބަ އޮތް ކަމަށެވެ. އެހެންކަމުން ރައީސަށް އިތުރު ބާރުތަކެއް ދީގެންވެސް ޤައުމުގައި ހިނގާ ކޮރަޕްޝަނާއި ފަސާދަ ހުއްޓުވަން ޖެހޭ ކަމަށް އޭނާ ވިދާޅުވިއެވެ. އަދި މިނިވަން މުއައްސަސާތަކުގެ ބާރު ރައީސުލްޖުމްހޫރިއްޔާގެ އަތްޕުޅަށް އައިސްގެން ނޫނިއްޔާ ޤައުމު އިޞްލާޙެއް ނުކުރެވޭނެ ކަމަށްވެސް ސަލީމް ވިދާޅުވިއެވެ.

ރާއްޖެއަށް ޑިމޮކްރަސީ ތަޢާރަފްވީ ފަހުން ހޭދަވި އަހަރުތަކުގައި ދިވެހި ދައުލަތުން ގާތްގަނޑަކަށް 15 ބިލިއަނެއްހާ ރުފިޔާގެ ޚިޔާނާތްވެފައިވާ ކަމަށް ލަފާކުރެވޭ ކަމަށާއި، ނަމަވެސް އެއިން އެއްވެސް ޚިޔާނާތެއްގެ ފައިސާ މިހާތަނަށް ލިބިފައި ނުވާކަން އޭނާ ފާހަގަކުރެއްވިއެވެ. މިއީ ޤާނޫނަށް އިޞްލާޙު ގެނެސްގެން ކަންކަން ރަނގަޅުކުރަން ޖެހިފައިވާ ކަމުގެ ހެއްކެއް ކަމަށްވެސް މެންބަރު ވިދާޅުވިއެވެ.

ސަލީމް ވިދާޅުވީ މަޖިލީހުން ގޯސްކޮށް ކަމެއް ހިނގައި ދިޔަޔަސް، އަދި ޖުޑީޝަރީން ގޯސްކޮށް ކަމެއް ހިނގާ ދިޔަޔަސް އެ ކަމެއް އިޞްލާޙު ކުރުމުގެ ބާރު އޮންނަން ޖެހޭނީ ރައީސުލްޖުމްހޫރިއްޔާގެ އަތްޕުޅުގައި ކަމަށެވެ.

މިހާރު ސަރުކާރުން ހުށަހަޅާފައިވާ އިޞްލާޙުގައި ވާގޮތުން އޭސީސީ އަދި އިލެކްޝަންސް ކޮމިޝަނަށް ރައީސަކާއި ނައިބު ރައީސެއް އައްޔަންކުރަން ކޮމިޝަންގެ މެންބަރުންގެ ތެރެއިން މެންބަރެއްގެ ނަން މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ.