ކޫއްޑޫ އެއާޕޯޓްގެ ރަންވޭ މަރާމާތުކޮށް އަލުން ހުޅުވައިފި

ކޫއްޑޫ އެއާޕޯޓްގެ ރަންވޭ މަރާމާތުކުރުމުގެ މަސައްކަތް ނިމި، އެއާޕޯޓަށް ފްލައިޓް ޖައްސަން ފަށައިފިއެވެ.

ރަންވޭ މަރާމާތަށްފަހު ފުރަތަމަ ފްލައިޓް ކޫއްޑޫއަށް ޖައްސާފައިވަނީ މިއަދު ހެނދުނު ކާޑެއްދޫއިން އައި މޯލްޑިވިއަންގެ ފްލައިޓެކެވެ.

ކޫއްޑޫ އެއާޕޯޓް ހިންގާ ކުންފުނީގެ އޮފިޝަލަކު ވިދާޅުވީ ރަންވޭގައި ކުރަންޖެހުނު މަރާމާތުގެ މަސައްކަތް ނިމިފައިވާ ކަމަށާއި، މިއަދުން ފެށިގެން ކޫއްޑޫއަށް ކުރިއެކޭ އެއްގޮތަށް އޮޕަރޭޝަން ކުރިއަށްދާނެ ކަމަށެވެ. މޯލްޑިވިއަނުންވެސް ވަނީ ކޫއްޑޫއަށް ދަތުރުތައް ފެށިކަން ޔަގީންކޮށްދީފައެވެ.

ކޫއްޑޫ އެއާޕޯޓަށް ކުރަމުން އައި ދަތުރުތައް ހުއްޓާލާފައިވަނީ އޮކްޓޯބަރުމަހުގެ އެއްވަނަ ދުވަހުއެވެ. މޯލްޑިވިއަނުނުން ބުނެފައިވަނީ ކޫއްޑޫ އެއާޕޯޓަށް ދަތުރުތައް ކުރުން ހުއްޓާލަންޖެހުނީ، އެއާޕޯޓްގެ ރަންވޭ ބޭނުންކުރަން އެކަށީގެން ނުވާތީއެވެ.

ކޫއްޑޫ އެއާޕޯޓް ހުޅުވާފައިވަނީ 2012 ވަނަ އަނަ އަހަރެވެ. އެ އެއާޕޯޓަކީ އެ ސަރަހައްދުގައި އޮތް އެންމެ ބިޒީ އެއާޕޯޓެވެ. މައުލޫމާތު ލިބިފައިވާ ގޮތުގައި ކޫއްޑޫ އެއާޕޯޓް ރަންވޭ ރަނގަޅަށް މަރާމާތުނުކުރާތާ ވަނީ ގިނަ އަހަރުތަކެއް ވެފައެވެ. ރަންވޭ މަރާމާތަށް ފަރުވާކުޑަވެގެން މޯލްޑިވިއަންގެ ބައެއް ފްލައިޓްތަކަށް ގެއްލުންވެސް ލިބިފައި އެބަހުއްޓެވެ.