ފަތުރުވެރިންގެ އަތުން ނަގާ ޓެކްސް ބޮޑުކުރުމުގެ ބިލުތައް ކޮމިޓީން ފާސްކޮށްފި

ރައްޔިތުންގެ މަޖިލިހުގެ ސަބުކޮމެޓީގެ މަސައްކަތް ކުރިއަށް ދަނީ / ފޮޓޯ:މަޖިލިސް

ފަތުރުވެރިންގެ އަތުން ނަގާ ގްރީން ޓެކްސް ދެ ގުނަކޮށް، އެއާޕޯޓް ޓެކްސް ބޮޑުކުރަން ސަރުކާރުން ހުށަހެޅި ބިލުތައް ރައްޔިތުންގެ މަޖިލީހުގެ މާލިއްޔަތު ކޮމިޓީއާއި އިގުތިސާދީ ކޮމިޓީގެ ސަބް ކޮމިޓީން މިއަދު ފާސްކޮށްފިއެވެ.

މި ދެ ބިލު ވެސް މަޖިލީހުން ބަލައިގަނެ، މުޅި މަޖިލީހުގެ ކޮމިޓީއަށް ފޮނުވާފައި ވަނީ މިމަހުގެ 16 ވަނަ ދުވަހުއެވެ.

ދިވެހިރާއްޖޭގެ ޓޫރިޒަމާ ބެހޭ ގާނޫނަށް ހުށަހެޅި އިސްލާހުގައިވަނީ ޓޫރިސްޓެއްގެ ބޮލަކަށް ދުވާލަކަށް ނަގާ ގްރީން ޓެކްސް ދެ ގުނަ ކުރުމަށެވެ. މި ބަދަލާ އެކު އަންނަ އަހަރު އެ ޓެކްސްގެ ގޮތުގައި ދައުލަތަށް 963.6 މިލިއަން ރުފިޔާ ލިބޭނެ ކަމަށް ވަނީ އަންދާޒާކޮށްފައެވެ.

އެއާޕޯޓްތަކުން ދިވެހި ރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމާ ބެހޭ ގާނޫނަށް ހުށަހެޅި އިސްލާހުގައިވަނީ އަންނަ ޑިސެމްބަރު މަހުން ފެށިގެން ޑިޕާޗާ ޓެކްސް ބޮޑުކުރުމަށެވެ. އެގޮތުން އިކޮނޮމީ ކުލާހުން ފުރާ ބިދޭސީންގެ އަތުން 50 ޑޮލަރު ނެގުމަށާއި، ބިޒްނަސް ކުލާހުން ފުރާ މީހުންގެ އަތުން 120 ޑޮލަރު ނެގުމަށް ވަނީ ހުށަހަޅައިފައެވެ.

މި ދެ ބިލު ވެސް ކޮމިޓީން ފާސްކޮށްފައި ވަނީ ބިލުގައި ހިމެނޭ ބައެއް މާއްދާތަކަށް ބަދަލު ގެނައުމަށް ނިންމުމަށް ފަހުއެވެ. މި ބިލުތައް ދެން ދާނީ މަޖިލީހުގެ ތަޅުމަށް ވޯޓަށް އެހުމަށެވެ.

ރައްޔިތުންގެ މަޖިލިސް ފަތުރުވެރިކަން