ތިލަމާލެ ބްރިޖުގެ މަސައްކަތް 45 އިންސައްތަ ނިމިއްޖެ: މުއްޠަލިބު

ތިލަމާލެ ބްރިޖު މަޝްރޫޢުގެ 45.82 އިންސައްތަ މަސައްކަތް މިހާރު ނިމިފައިވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.

ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި މިނިސްޓަރު ހާމަކުރެއްވި ގޮތުގައި ތަނބުތަކުގެ ޕައިލިން މަސައްކަތުގެ 79.5 އިންސައްތަ، ޕްރީކާސްޓު ސެގްމަންޓުގެ 43.5 އިންސައްތަ، އަދި ޕައިލް ކެޕްގެ މަސައްކަތުގެ 67.8 އިންސައްތަ ނިމިފައިވެއެވެ.

އެހެންނަމަވެސް، މަސައްކަތް ނިންމުމުގައި ތާވަލުގައި އޮތް މިންވަރަށްވުރެ ބޮޑުތަނުން ލަސްވެފައިވާކަމަށް މިނިސްޓަރު ފާހަގަކުރެއްވިއެވެ. މީގެ މައިގަނޑު ސަބަބުތަކެއްގެ ގޮތުގައި މިނިސްޓަރު ފާހަގަކުރެއްވީ، ފުން ކަނޑުގައި ބްރިޖު އެޅުމުގެ ތަޖުރިބާ އެފްކޮންސްގައި ނެތުމާއި، މަސައްކަތުގެ ބުރަކަން އަންޑާ އެސްޓިމޭޓްކުރުމެވެ. މި ސަބަބުތަކާ ގުޅިގެން، ސަޕްލިމަންޓަރީ އެގްރިމަންޓެއްގައި ސޮއިކޮށް މަޝްރޫއު ނިންމަން އިތުރު 30 މަސްދުވަސް ދީފައިވާކަން މިނިސްޓަރު ހާމަކުރެއްވިއެވެ.

މިނިސްޓަރު އިތުރަށް ވިދާޅުވި ގޮތުގައި، އެފްކޮންސްއިން މިހާރުވެސް މަސައްކަތް ލަސްކުރުމަށް އެކި ބަހަނާތައް ދައްކަމުން އަންނަ ކަމަށާއި، މޫސުމީ އެކި ކަންކަމާއި ކަނޑު ގަދަވުން ފަދަ ކަންކަމާ ގުޅުވައި ބައެއް މުހިންމު މަސައްކަތްތައް ލަސްކުރާކަމަށެވެ. ޚާއްޞަކޮށް ޑީޕް ސީ ޕައިލިންގެ މަސައްކަތް ސަރުކާރުން އެދޭ ސްޕީޑުގައި ކުރިއަށް ނުދާކަން މިނިސްޓަރު ފާހަގަކުރެއްވިއެވެ.

ނަމަވެސް، މި ބަހަނާތަކަކީ ސަރުކާރުން ގަބޫލުކުރާ ކަންތައްތަކެއް ނޫންކަމަށާއި، މަސައްކަތް ލަސްކުރުމަށް އިތުރު މުއްދަތު ނުދެވޭނެކަމަށް މިނިސްޓަރު ވިދާޅުވިއެވެ. މި ކަންބޮޑުވުންތައް ކޮންޓްރެކްޓަރުންނާ ހިއްސާކޮށް، ގަވާއިދުން ބައްދަލުވުންތައް ބާއްވަމުން އަންނަކަމަށް މިނިސްޓަރު ހާމަކުރެއްވިއެވެ.

މި ހުރިހާ ގޮންޖެހުންތަކާއެކުވެސް، މަޝްރޫޢު ތާވަލާ އެއްގޮތަށް ނިންމޭނެކަމުގެ އުންމީދު އަދިވެސް އޮތްކަމަށް މިނިސްޓަރު ވިދާޅުވިއެވެ. އަދި މަޝްރޫޢުގެ ކުރިއެރުން ގާތުން ބަލަހައްޓަމުންދާނެކަމަށާއި، ދިމާވާ ދަތިތައް ޙައްލުކުރުމަށް ސަރުކާރުން އަޅަންޖެހޭ ފިޔަވަޅުތައް އަޅަމުންދާނެކަމަށްވެސް މިނިސްޓަރު ވިދާޅުވިއެވެ.