އެމެރިކާގެ ރިޔާސީ އިންތިޚާބަށް ދެ ހަފްތާ، ޕޯލްތަކުން ކުރީގައި އުޅުންވަނީ ހެރިސް

އެމެރިކާގެ ރިޔާސީ އިންތިޚާބަށް ގާތްގަނޑަކަށް ދެ ހަފްތާއަށް ވެފައިވާއިރު، ފޯބްސްއިން ރިޕޯޓުކޮށްފައިވާ ގޮތުގައި އެންމެ ފަހުން ނެގި ދެ ޕޯލްގައި ކުރީގައި އުޅުއްވަނީ ވެރިކަންކުރާ ޑިމޮކްރެޓިކް ޕާޓީން ރިޔާސީ އިންތިޚާބުގައި ވާދަކުރައްވާ، ނައިބު ރައީސް ކަމަލާ ހެރިސްއެވެ.

އިންތިޚާބު ކާމިޔާބު ކުރައްވާނެ ކެންޑިޑޭޓަކު ބެލުމަށް ގިނަ ޕޯލްތަކެއް ނަގާފައިވެއެވެ.

އޭބީސީ/އިޕްސޯސްއިން ނަގާފައިވާ ޕޯލްގައި ހެރިސް އިންތިޚާބު ކާމިޔާބު ކުރައްވާނެ ކަމަށް 51 އިންސައްތަ މީހުން ބުނެފައިވާއިރު، 47 އިންސައްތަ މީހުން ބުނެފައިވަނީ ޓްރަމްޕް ކާމިޔާބު ކުރައްވާނެ ކަމަށެވެ. ހަމައެހެންމެ، ސީބީއެސް/ޔޫގަވް އިން ނެގި ޕޯލުން ދައްކާ ގޮތުގައި ހެރިސް އިންތިޚާބު ކާމިޔާބު ކުރައްވާނެ ކަމަށް 50 އިންސައްތަ މީހުން ބުނެފައިވާއިރު، ޓްރަމްޕް ކާމިޔާބު ކުރައްވާނެ ކަމަށް ބުނެފައިވަނީ 49 އިންސައްތަ މީހުންނެވެ.

އެހެންނަމަވެސް، ކުރިން ނެގުނު ބައެއް ޕޯލްތަކުން ދެ ކެންޑިޑޭޓުން އެއްވަރުވެފައިވާ މަންޒަރު ފެނިފައިވެއެވެ. މިގޮތުން، މި މަހުގެ 23 ން 24 އަށް ނަގާފައިވާ ޕޯލަކުން ދައްކާފައިވާ ގޮތުގައި ދެ ކެންޑިޑޭޓުން އެއްވަރުވެފައި ވަނީ 49 އިންސައްތަ ވޯޓުންނެވެ. އަދި ހުކުރު ދުވަހު ނެރުނު ޓައިމްސް/ސިއެނާ ޕޯލްގައިވެސް ޓްރަމްޕާއި ހެރިސް 48 އިންސައްތަ ވޯޓުން އެއްވަރުވެފައިވެއެވެ.

"ސްވިންގް" ސްޓޭޓްތަކަށް ބަލާއިރު، މިޝިގަން އާއި ނެވާޑާގައި ހެރިސް ލީޑް ކުރައްވާއިރު، ވިސްކޮންސިން، ޕެންސިލްވޭނިއާ އަދި ނޯތު ކެރޮލައިނާގައި ޓްރަމްޕް އަންނަނީ ލީޑް ކުރައްވަމުންނެވެ. ޖޯޖިއާ އާއި އެރިޒޯނާގައި ދެ ކެންޑިޑޭޓުން ވެސް ވަނީ އެއްވަރަކަށް ވޯޓު ހޯއްދަވާފައެވެ.

އަންނަ މަހުގެ ފަސްވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބަށް ދެ ކެންޑިޑޭޓުން ވެސް އަންނަނީ ފޯރިގަދަ ވާދަވެރި ކެމްޕޭނެއް ކުރިއަށް ގެންދަވަމުންނެވެ.