ލިވަޕޫލާއި އާސެނަލުގެ މެޗު އެއްވަރުވެ، ލިވަޕޫލު ތާވަލުގެ 2 ވަނައަށް

އިނގިރޭސި ޕްރިމިއާ ލީގުގައި ރޭ ތާވަލުގެ 1 ވަނާގައި އޮތް ލިވަޕޫލާއި އާސެނަލް ބައްދަލުކުރި މެޗު 2-2 ން އެއްވަރުވުމުން ލިވަޕޫލު ތާވަލުގެ 2 ވަނައަށް ވެއްޓިއްޖެއެވެ.

ފޯރިގަދަ ކުޅުމެއް ފެނިގެން ދިޔަ އާސެނަލާއި ލިވަޕޫލްގެ މެޗުގައި އާސެނަލަށް ގޯލުތައް ޖަހާދީފައި ވަނީ ބުކާޔޯ ސަކާ އާއި މިކޭލް މެރީނޯ އެވެ. އަދި ލިވަޕޫލުގެ ލަނޑުތައް ކާމިޔާބުކޮށްދީފައި ވަނީ ވާޖިލް ވެން ޑައިކް އާއި މުހައްމަދު ސަލާހް އެވެ.

ރޭ ކުޅުނު އިތުރު މެޗުތަކަށް ބަލާއިރު މެންޗެސްޓާ ޔުނައިޓެޑް 2-1 އިން ވެސްޓް ހޭމް ޔުނައިޓެޑް އަތުން ބަލިވިއިރު، ޗެލްސީން 2-1 އިން ނިއުކާސަލް ޔުނައިޓެޑް އަތުން ވަނީ މޮޅުވެފައެވެ.

ވެސްޓް ހޭމްގެ ކްރައިސެންސިއޯ ސަމާވިލް ގޯލެއްޖަހާ ލީޑު ނަގާފައި ވަނިކޮށް ޔުނައިޓެޑަށް ކަސެމީރޯ އެއްވަރުކޮށްދިން ނަމަވެސް، ޑިފެންޑަރު މަތައިސް ޑި ލިޓް ފައުލުކުރުމުން ލިބުނު ޕެނަލްޓީއަކުން ޖެރަޑް ބޮވެން ވަނީ ވެސްޓް ހޭމް މޮޅުކޮށްދީފައެވެ.

ޗެލްސީން އާއި ނިއުކާސަލް ޔުނައިޓެޑް ބައްދަލުކުރި މެޗުގައި ޗެލްސީގެ ގޯލުތައް ކާމިޔާބުކޮށްދީފައި ވަނީ ނިކޮލަސް ޖެކްސަން އާއި ކޯލް ޕާމާ އެވެ.  ނިއުކާސަލްގެ ހަމައެކަނި ލަނޑު ޖެހީ އަލެކްސަންޑަ އިސާކް އެވެ.

ކޮންމެ ޓީމެއްވެސް ލީގުގައި 9 މެޗު ކުޅެފައިވާއިރު ލީގު ތާވަލުގެ އެއްވަނާގައި 23 ޕޮއިންޓާއި އެކު މިވަގުތު އޮތީ  މެންޗެސްޓާ ސިޓީ އެވެ. 22 ޕޮއިންޓާއި އެކު 2 ވަނާގައި ލިވަޕޫލު އޮތްއިރު 18 ޕޮއިންޓާއި އެކު 3 ވަނާގައި އޮތީ އާސެނަލް އެވެ. ޔުނައިޓެޑް މިހާރު އޮތީ ލީގުގެ 14 ވަނައިގައެވެ.