ބޭހުގެ އަގު ކޮންޓްރޯލްކުރުމަށް އެންސްޕާއިން އިތުރު ފިޔަވަޅުތަކެއް އަޅައިފި

އާސަންދަ ނިޒާމު ދެމެހެއްޓެނިވި ގޮތެއްގައި ފެންވަރު ރަނގަޅު ޚިދުމަތެއްގެ ގޮތުގައި ދެމެހެއްޓުމަށްޓަކައި، ރާއްޖޭގައި އެންމެ ގިނައިން ބޭނުންކުރާ 250 ބޭހެއްގެ އަގު އަންނަ މަހުން ފެށިގެން ކޮންޓްރޯލްކުރާނެ ކަމަށް އެންސްޕާއިން ރޭ ބުނެފިއެވެ.

މި ފިޔަވަޅުތަކުގެ ސަބަބުން، މިހާރު ބޮޑު އަގުގައި ވިއްކަމުން އަންނަ ބޭސްތަކުގެ އަގު ހެޔޮވެ، އާސަންދަ ސްކީމުގެ ދަށުން ބޭހަށް ކުރާ ޚަރަދުން އަހަރަކު 220 މިލިއަން ރުފިޔާ ސަލާމަތްކުރެވޭނެ ކަމަށް އެންސްޕާއިން ނެރުނު އިޢުލާނުގައި ބުނެފައިވެއެވެ.

އެންސްޕާއިން ހާމަކުރި ގޮތުގައި، 250 ބޭހުގެ އަގަށް ބަދަލު ގެންނާނީ އެކި ފިޔަވަހިތަކަކަށް ބަހާލައިގެންނެވެ. މިގޮތުން، 87 ބޭހެއްގެ އަގަށް ނޮވެމްބަރު 1 އިން ފެށިގެން ބަދަލު ގެނައުމަށްފަހު، އިތުރު 126 ބޭހެއްގެ އަގަށް ނޮވެމްބަރު 24 އިން ފެށިގެން ބަދަލު ގެންނަން ވަނީ ނިންމާފައެވެ.

އަގު ކޮންޓްރޯލްކުރާ ހުރިހާ ބޭހެއް ވެސް އެސްޓީއޯގެ ބޭސްފިހާރަތަކުން ލިބެން ހުންނާނެ ކަމަށް އެންސްޕާއިން ބުނެފައިވެއެވެ. އަދި މި ބަދަލާ ގުޅިގެން އާސަންދަ ސްކީމު މެދުވެރިކޮށް ރައްޔިތުންނަށް ހިލޭ ބޭސް ލިބިދިނުމުގެ އިންތިޒާމަށް އެއްވެސް ބަދަލެއް ނާންނާނެ ކަމަށްވެސް އެ އިދާރާއިން ބުނެފައިވެއެވެ.

މި ފިޔަވަޅުތަކަކީ ރައީސް ޑރ. މުޙައްމަދު މުޢިއްޒުގެ ސީދާ ބެއްލެވުމުގެ ދަށުން އެންސްޕާއިން ކުރަމުން އަންނަ މަސައްކަތެއްގެ ބައެކެވެ. މިދިޔަ ސެޕްޓެމްބަރު މަހު ރައީސް މުޢިއްޒު ވަނީ ރާއްޖޭގައި އާދަޔާ ޚިލާފު ބޮޑު ފައިދާއެއް ލައިގެން ބޭސް ވިއްކުމުގެ މައްސަލަ ޙައްލުކުރުމަށް ޤާނޫނުގައި ކަނޑައަޅާފައިވާ ކަންކަން ތަންފީޒުކުރުމަށް ކަމާބެހޭ އިދާރާތަކަށް އަންގަވާފައެވެ.