ރައްޔިތުންގެ މަޖިލީހަށް މީޑިއާ ޑިރެކްޓަރަކު ހޯދަން އިޢުލާންކޮށްފި

ރައްޔިތުންގެ މަޖިލީހަށް މީޑިއާ ޑިރެކްޓަރަކު ހޯދުމަށް އިޢުލާނުކޮށްފިއެވެ.

މަޖިލީހުގެ އިދާރާއިން ކުރި އިޢުލާނުގައި ބުނެފައިވަނީ، މީޑިއާ އެންޑް ކޮމިއުނިކޭޝަން ސެކްޝަންގެ ލެޖިސްލޭޓިވް އެފެއާޒް ޑިޕާޓްމަންޓަށް ޑިރެކްޓަރެއް ބޭނުންވާ ކަމަށެވެ.

މި މަޤާމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުތުތަކުގެ ތެރޭގައި، ނޫސްވެރިކަމުގެ ދާއިރާއިން މާސްޓަރސް ޑިގްރީ ހާސިލުކޮށްފައިވުން ނުވަތަ ޕޯސްޓް ގްރެޖުއޭޓް ސެޓްފިކެޓް/ޑިޕްލޮމާ ހާސިލުކޮށް، 3 އަހަރުގެ މަސައްކަތު ތަޖުރިބާ ލިބިފައިވުން ހިމެނެއެވެ. މީގެ އިތުރުން، ނޫސްވެރިކަމުގެ ދާއިރާއިން ބެޗްލަރސް ޑިގްރީ ހާސިލުކޮށް، 6 އަހަރުގެ މަސައްކަތު ތަޖުރިބާ ލިބިފައިވާ ފަރާތްތަކަށްވެސް މި މަޤާމަށް ކުރިމަތިލެވޭނެއެވެ.

މަޖިލީހުގެ އިދާރާއިން އިއުލާނުކޮށްފައިވާ ގޮތުގައި، މި މަޤާމަށް އެދި ހުށަހެޅުމުގެ ސުންގަޑިއަކީ 7 ނޮވެންބަރު 2024 ވާ ބުރާސްފަތި ދުވަހުގެ މެންދުރު 14:00 އެވެ. ވަޒީފާއަށް އެދޭ ފަރާތްތަކުން https://majlis.gov.mv/apply މެދުވެރިކޮށް އޮންލައިންކޮށް ފޯމު ހުށަހަޅަންވާނެ ކަމަށްވެސް މަޖިލިހުން ބުނެފައި ވެއެވެ. އަދި ހުށަހަޅަންޖެހޭ ލިޔެކިޔުންތައް ޕީ.ޑީ.އެފް ފޯމެޓުގައި އެއް ފައިލެއްގެ ގޮތުގައި އެޓޭޗްކުރަންވާނެ ކަމަށްވެސް އިޢުލާނުގައި ބަޔާންކޮށްފައިވެއެވެ.