އިންޑިއާގެ އައިވީ ބޭހެއްގައި މައްސަލަ ހުރުމުން އެމްއެފްޑީއޭއިން ސަމާލުވުމަށް އެދިއްޖެ

އިންޑިއާގައި އުފައްދާފައިވާ ނޯމަލް އިމިއުނޯގްލޮބިއުލިން އައިވީ ބެޗެއްގައި މައްސަލަތަކެއް ހުރުމުން، އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން މިއަދު އިލްތިމާސްކޮށްފިއެވެ.

މައްސަލަ ފާހަގަވެފައި ވަނީ އިންޑިއާގެ އައިކޯ ބަޔޮލޮޖިކްސް ލިމިޓެޑްއިން އުފައްދާފައިވާ، ނޯމަލް އިމިއުނޯގްލޮބިއުލިން ފޯ އިންޓްރަވީނަސް ޔޫސް ބީޕީ ފަސް ޕަސެންޓްގެ ހަތަރު ބެޗެއްގައެވެ.

އެމްއެފްޑީއޭއިން ބުނީ ރާއްޖެއަށް އިމްޕޯޓް ކުރުމާއި ވިއްކުމަށް ހުއްދަކޮށްފައިވާ ބޭހުގެ ލިސްޓުގައި އެ ކުންފުނީގެ އެއްވެސް ބޭހެއް ނުހިމެނޭ ކަމަށެވެ. އެހެން ނަމަވެސް އިންޑިއާއާއި ލަންކާއަކީ ދިވެހިން ބޭސް ފަރުވާއަށް ގޮސް އުޅޭ ގައުމުތަކަށް ވެފައި ބައެއް ހާލަތްތަކުގައި އަމިއްލަ ބޭނުމަށް އެ ގައުމުތަކުން ބޭސް އިމްޕޯޓް ކުރާތީ އެކަމަށް ސަމާލުވުމަށް އެމްއެފްޑީއޭއިން އެދިފައިވެއެވެ.

މީގެ އިތުރުން ރައްކާތެރިކަމުގެ ފިޔަވަޅެއްގެ ގޮތުން ބޭސް ސިޓީއަށް ބޭސް އެތެރެ ކުރާއިރު ޚާއްސަ ސަމާލުކަމެއް ދީގެން ޕޯޓްތަކުގައި ބަލައިފާސްކުރަމުން ގެންދާނެ ކަމަށް އެ އޮތޯރިޓީން ބުންޏެވެ. އެކަމާ ގުޅޭ އިތުރު މައުލޫމާތު އެމްއެފްޑީއޭގެ ހޮޓްލައިން ނަމްބަރު 7200321އިން ލިބޭނެއެވެ.

ހިއުމަން ނޯމަލް އިމިއުނޯގްލޮބިއުލިންއަކީ އިންފެކްޝަންތަކާ ދެކޮޅަށް މަސައްކަތް ކުރުމަށް ހަށިގަނޑަށް ބޭނުންވާ އެންޓިބޮޑީތައް ލިއްބައިދޭ ބޭހެކެވެ.