ބާސެލޯނާއިން އެލް ކްލާސިކޯ 4-0 އިން ކާމިޔާބުކޮށްފި

ސްޕެނިޝް ލީގުގައި ރޭ ކުޅެވުނު ބޮޑުމެޗުގެ ދެ ވަނަ ހާފުގައި ޖެހި ގޯލުތަކާ އެކު، ބާސެލޯނާ އަތުން އަމިއްލަ ދަނޑުގައި ރެއާލް މެޑްރިޑު 4-0 އިން ހިތްދަތި ގޮތަކަށް ބަލިވެއްޖެ އެވެ.

މި ނަތީޖާއާ އެކު، ލީގުގައި ބަލިނުވެ ބާސެލޯނާ އިން ހަދާފައި އޮތް ރެކޯޑާ ހަމަކުރަން ރެއާލުން ކުރި މަސައްކަތް ފެނަށް ދިޔައީ އެވެ. ބާސެލޯނާ އިން ބަލިނުވެ، 43 މެޗު ހަމަކުރިއިރު، ރޭގެ މެޗަކީ، ރެއާލުން ބަލިނުވެ، ކުރިމަތިލި 43 ވަނަ މެޗެވެ. އެކަމަކު، އެ ޓީމު މި ވަނީ އަމިއްލަ ދަނޑުގައި ލަދުވެތި ގޮތަކަށް ބަލިވެފަ އެވެ.

ރެއާލް ދަނޑުގައި ރޭ އެ ޓީމުން 30 ވަނަ މިނިޓްގައި ލީޑުނެގި އެވެ. އެކަމަކު، ކީލިއަން އެމްބާޕޭ ޖެހި މި ގޯލު ވަނީ އޮފްސައިޑް ކަމަށް ނިންމައިފަ އެވެ. އެމްބާޕޭ، މި މެޗުގައި ގިނަ ފަހަރުތަކެއް މަތިން ވަނީ އޮފްސައިޑްވެފަ އެވެ. މެޗުގެ އޮއެވަރު ބާސެލޯނާ ކޮޅަށް އެނބުރުނީ ތިން މިނިޓް ތެރޭ، ރޮބަޓް ލެވަންންޑޯސްކީ ދެ ގޯލު ޖަހައި، ބާސެލޯނާ އަށް ލީޑެއް ހޯދައިދިނުމުންނެވެ. ލެވަންޑޯސްކީ ފުރަތަމަ ގޯލު ޖެހީ 54 ވަނަ މިނިޓްގަ އެވެ، އޭގެ ދެ މިނިޓް ފަހުން، އޭނާ ދެ ވަނަ ގޯލު ޖެހި އެވެ.

ބާސެލޯނާ އިން 77 ވަނަ މިނިޓްގައި ތިން ވަނަ ގޯލު ޖެހި އެވެ. ރަފީނިއާ ދިން ބޯޅައަކުން މި ލަނޑު ޖެހީ 17 އަހަރުގެ ލަމީން ޔަމާލް އެވެ. މި ގޯލާ އެކު، ޔަމާލް ވެފައިވަނީ، އެލް ކްލަސިކޯގެ ތާރީހުގައި ވެސް ގޯލު ޖެހި އެންމެ އުމުރުން ހަގު ކުޅުންތެރިޔާ އަށެވެ. އޭނާ ގޯލު ޖެހިއިރު، އުމުރަކީ 17 އަހަރާއި 106 ދުވަހެވެ. އަދި އޭގެ ހަތް މިނިޓް ފަހުން، މެޗުގެ 84 ވަނަ މިނިޓްގައި ރަފީނިއާ ވަނީ ބާސެލޯނާގެ ހަތަރު ވަނަ ގޯލު ޖަހައިފަ އެވެ.

މި މޮޅާ އެކު، ބާސެލޯނާ ވަނީ ލީގުގެ އެއް ވަނައިގައި ހަ ޕޮއިންޓުގެ ލީޑެއް ނަގައިފަ އެވެ. އެ ގޮތުން 11 މެޗުން ބާސެލޯނާ އަށް 30 ޕޮއިންޓް ލިބިފައިވާއިރު، ރެއާލް ދެ ވަނައިގައި އޮތީ 11 މެޗުން 24 ޕޮއިންޓާ އެކު އެވެ. ހަންސީ ފްލިކްގެ ކޯޗުކަމުގައި ރަނގަޅު ކުޅުމެއް ދައްކަމުން އަންނަ ބާސެލޯނާ އިން މި ވަނީ ހަފްތާއެއްގެ ތެރޭގައި ބަޔާން މިއުނިކާއި ރެއާލް މެޑްރިޑް ބަލިކޮށްފަ އެވެ.