މާފަރު އެއާޕޯޓު ބައިނަލްއަޤްވާމީ ދަތުރުތަކަށް އަލުން ހުޅުވާލައިފި

މާފަރު އިންޓަނޭޝަނަލް އެއާޕޯޓުގެ ރަންވޭ ބޮޑުކުރުމުގެ މަސައްކަތް ނިންމައި، ބައިނަލްއަޤްވާމީ ދަތުރުތަކަށް އަލުން ހުޅުވާލައިފި އެވެ.

މި މަސައްކަތުގެ ދަށުން ރަންވޭގެ ދިގުމިން 2،800 މީޓަރަށް ބޮޑުކޮށް، 650 މީޓަރު އިތުރުކޮށްފައިވެ އެވެ. މިހާރު ބޮއިން 777 މާކާގެ ބޯޓުތަކަށް ވެސް މި އެއާޕޯޓަށް ޖެއްސޭނެ ކަމަށް އައިލެންޑް އޭވިއޭޝަނުން މަޢުލޫމާތު ދީފައިވެ އެވެ.

އައިލެންޑް އޭވިއޭޝަނުން އޮޕަރޭޓްކުރާ މާފަރު އެއާޕޯޓު ފުރަތަމަ ހުޅުވީ 2019 ވަނަ އަހަރުގެ ޑިސެންބަރު މަހުގެ 1 ވަނަ ދުވަހު އެވެ. ނަމަވެސް ރަންވޭ ބޮޑުކުރުމަށްޓަކައި ބައިނަލްއަޤްވާމީ ދަތުރުތައް މެދުކަނޑާލީ މިދިޔަ އަހަރުގެ މެއި މަހު އެވެ. މިހާރު އަލުން އެ ދަތުރުތަކަށް ހުޅުވާލުމާ ގުޅިގެން، މާފަރު އެއާޕޯޓަކީ ރާއްޖެއަށް އެންމެ ގިނަ އަދަދަކަށް ޖެޓު ޖައްސާ އެއް އެއާޕޯޓުގެ ގޮތުގައި ދެމިއޮންނާނެ އެވެ.

މާފަރު އެއާޕޯޓުގެ އޭޕްރަން ބޮޑުކުރުމުގެ މަޝްރޫޢު ވެސް އެމްޓީސީސީއާ ހަވާލުކޮށްގެން މިހާރު ދަނީ ކުރިއަށެވެ. މި 29.85 މިލިއަން ރުފިޔާގެ މަޝްރޫޢު ނިމުމުން އެއްފަހަރާ 26 ޖެޓު ޕާކުކުރެވޭނެ ކެޕޭސިޓީ ހުންނާނެ އެވެ. މިއީ މިހާރު ހުރި 13 ޖެޓުގެ ޖާގައަށް ވުރެ ދެ ގުނަ އިތުރު އަދަދެކެވެ.

އަހަރެއްގެ މައްޗަށް އެވްރެޖްކޮށް 700 އެއަރ ޓްރެފިކް މޫވްމަންޓްސް ރެކޯޑުކުރެވޭ މި އެއާޕޯޓަކީ ވެލާނާ އިންޓަނޭޝަނަލް އެއާޕޯޓަށް ފަހު ރާއްޖޭގައި ހެދި އެންމެ ބޮޑު އެއާޕޯޓެވެ. އަބޫދާބީ ފަންޑް ފޯ ޑިވެލޮޕްމަންޓުން 60 މިލިއަން ޑޮލަރު ހޭދަކޮށްގެން ހަދާފައިވާ މި އެއާޕޯޓު އަޕްގްރޭޑްކުރުމާ ގުޅިގެން، ރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ލިބޭނެ ކަމަށް ބެލެވެ އެވެ.