ގުޅިފަޅުން ގޯތި ލިބޭ ފަރާތްތަކުގެ ގުރުނެގުން އަންނަ އަންގާރަ ދުވަހު

ބިންވެރިޔާ ސްކީމްގެ ދަށުން ގުޅިފަޅުން ގޯތި ލިބޭ ފަރާތްތަކުގެ ގުރުނެގުން އަންނަ އަންގާރަ ދުވަހު ބޭއްވުމަށް ހައުސިންގ މިނިސްޓްރީން ނިންމައިފިއެވެ.

މީގެ ތެރޭގައި ކުރިން ގިރާވަރުފަޅުން ގޯތި ލިބި، ގުޅިފަޅަށް ބަދަލުކުރި ފަރާތްތަކާއި، މިހާތަނަށް ގުޅިފަޅުން ގޯތި ލިބިފައިވާ އެންމެހައި ފަރާތްތައް ހިމެނެއެވެ.

ގުޅިފަޅު ލޭންޑް ޔޫސް ޕްލޭނަށް އައި ބަދަލާ ގުޅިގެން، ކުރިން ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކުގެ ގޯތީގެ ލޮކޭޝަން ބަދަލުވެފައިވާ ކަމަށް މިނިސްޓްރީން މަޢުލޫމާތު ދީފައިވެއެވެ. މި ބަދަލާ ގުޅިގެން އަލުން ގުރުނެގުން ބާއްވަން ނިންމާފައިވަނީ ގޯތިތަކުގެ ވެރިފަރާތްތަކަށް އިންސާފުވެރި ފުރުޞަތެއް ދިނުމުގެ ގޮތުންނެވެ.

ގުޅިފަޅުން ދޫކުރާ ގޯތިތަކުގެ ތަފްޞީލު މިނިސްޓްރީން ހާމަކޮށްފައިވެއެވެ. އެގޮތުން 1250 އަކަފޫޓުން ފެށިގެން 3650 އަކަފޫޓާ ހަމައަށް ތަފާތު ބޮޑުމިނުގެ ޖުމްލަ 3,520 ގޯތި ދޫކުރުމަށް ހަމަޖެހިފައިވެއެވެ. މީގެ ތެރެއިން އެންމެ ގިނައިން ދޫކުރަނީ 1650 އަކަފޫޓުގެ 1,234 ގޯއްޗެވެ.

ގުރުނެގުން ކުރިއަށްދާނީ އަންގާރަ ދުވަހުގެ ހެނދުނު 9:00 ގައި ދަރުބާރުގޭގެ ރަންނަ ބަނޑޭރި މާލަމުގައެވެ. ގުރުނެގުމުގައި ބައިވެރިވާ ފަރާތްތަކުގެ ތަރުތީބު ކަނޑައަޅާފައިވަނީ މިނިސްޓްރީން އެކުލަވާލާފައިވާ ލިސްޓުތަކުގައިވާ ގޮތުގެ މަތިންނެވެ. ގޯތި ލިބޭ ފަރާތުގެ ބަދަލުގައި އެހެން ފަރާތަކުން ހާޒިރުވާނަމަ، ބިން ލިބޭ ފަރާތުގެ އިއުތިރާޒެއް ނެތްކަމުގެ ލިޔުމާއި އައިޑީކާޑުގެ ކޮޕީ ގެންދިއުމަށް މިނިސްޓްރީން އަންގާފައިވެއެވެ.

ގުރުނަގާ ނިމުމުން، ގޯތިތަކުގެ ރަޖިސްޓްރީއާއި ބިން ލިބޭ ފަރާތްތަކާއެކު ވެވޭ އެއްބަސްވުންތަކާ ގުޅޭ މަޢުލޫމާތު ފަހުން ހިއްސާކުރާނެ ކަމަށް މިނިސްޓްރީން ބުނެފައިވެއެވެ. މި ގުރުނެގުމަކީ ނިމިދިޔަ ސަރުކާރުން ފެށި ބިންވެރިޔާ ސްކީމްގެ ބައެއްގެ ގޮތުގައި ކުރިއަށްގެންދެވޭ ކަމެއް ކަމަށްވާއިރު، މި ސްކީމްގެ ދަށުން ޖުމްލަ 9,003 ގޯތި ދޫކުރުމަށް ވަނީ ނިންމާފައެވެ.