ތޫފާން "ދާނާ" އިންޑިއާގެ އިރުމަތީ ސަރަހައްދަށް އަރައިފި

އިންޑިއާގެ އިރުމަތީގެ ބައެއް ހިސާބުތަކަށް ބޯކޮށް ވާރޭވެހި ބާރު ވަޔާ އެކު ތޫފާނު "ދާނާ" އަރައިފިއެވެ.

މި ތޫފާން އޮޑިޝާ ސްޓޭޓްގެ އުތުރު އައްސޭރިފަށަށް އަރާފައިވާއިރު، ގަޑިއަކު 110 ކިލޯމީޓަރުގެ ބާރުމިނުގައި ވައިޖެހޭ ކަމަށް ޖޮއިންޓް ޓައިފޫން ވާނިން ސެންޓަރު (ޖޭޓީޑަބްލިއުސީ) އިން މަޢުލޫމާތު ދީފައިވެއެވެ.

އިންޑިއާ ގަޑިން ހެނދުނު 9 ޖެހިއިރު، ކޮލްކަތާގެ ހުޅަނގު ދެކުނުން ގާތްގަނޑަކަށް 250 ކިލޯމީޓަރު ދުރުގައި އޮތް މި ތޫފާން ގަޑިއަކު 12 ކިލޯމީޓަރުގެ ބާރުމިނުގައި ހުޅަނގު އުތުރަށް ދަތުރުކުރަމުން ދިޔައެވެ. ތޫފާނުގެ ސަބަބުން އޮޑިޝާ އާއި ހުޅަނގު ބެންގަލް ސްޓޭޓަށް 50-150 މިލިމީޓަރު އާއި ދެމެދުގެ މިންވަރަކަށް ވާރޭ ވެހިފައިވެއެވެ. އެންމެ ގިނައިން ވާރޭ ވެހިފައިވަނީ ޗަންދުބަލީ ޓައުންއަށް ކަމަށްވާއިރު، އެއީ 160 މިލިމީޓަރުގެ ވާރޭއެކެވެ.

ތޫފާން އެރުމުގެ ކުރިން ކަމާބެހޭ ފަރާތްތަކުން ވަނީ ލައްކައެއްހާ މީހުން ތޫފާން އަރާނެ ކަމަށް ބެލެވޭ ހިސާބުތަކުން ނެރެފައެވެ. އަދި ސްކޫލްތައް ބަންދުކޮށް، ބައެއް ހިސާބުތަކުގެ ރޭލުތަކާއި ފްލައިޓްތައްވެސް ކެންސަލްކޮށްފައި ވެއެވެ. އިންޑިއާ މީޓިއޮރޮލޮޖިކަލް ޑިޕާޓްމަންޓުން ވަނީ އޮޑިޝާއާއި ހުޅަނގު ބެންގަލްގެ ބައެއް ހިސާބުތަކަށް ރަތް ސަމާލުކަން ނެރެފައެވެ.

އޮޑިޝާގެ ޗީފް މިނިސްޓަރު މޯހަން ޗަރަން މާޖީ ވިދާޅުވި ގޮތުގައި، ތޫފާންގެ ކުރިން ގާތްގަނޑަކަށް 300،000 މީހުން ރައްކާތެރި ހިސާބުތަކަށް ގެންގޮސްފައިވެއެވެ. އަދި ތިން ޑިސްޓްރިކްޓަކަށް ތޫފާންގެ އަސަރު ވަރަށް ބޮޑަށް ކުރާނެ ކަމަށް ބެލެވޭ ކަމަށްވެސް އޭނާ ވިދާޅުވިއެވެ. ކަމާބެހޭ ފަރާތްތަކުން ރާވާފައިވަނީ 14 ޑިސްޓްރިކްޓަކުން އެއް މިލިއަނަށް ވުރެ ގިނަ މީހުން ނެރުމަށެވެ.

އިންޑިއާގެ އިރުމަތީ އައްސޭރިފަށަކީ ޒަމާނުއްސުރެ ތޫފާން އަރާ ސަރަހައްދެކެވެ. ނަމަވެސް، ފަހަކަށްއައިސް ތޫފާންތައް އަރާ މިންވަރު ވަނީ ވަރަށް ބޮޑަށް އިތުރުވެފައެވެ. މިދިޔަ އަހަރަކީ އިންޑިއާއަށް އެންމެ ގިނައިން ތޫފާން އެރި އަހަރު ކަމަށްވާއިރު، އެ ތޫފާންތަކުގައި 523 މީހުން މަރުވެ، 2.5 ބިލިއަން ޑޮލަރުގެ ގެއްލުން ލިބިފައިވެއެވެ.