ޓޫރިޒަމް ދާއިރާގެ ވިޔަފާރިތަކުން އެމްއެމްއޭގައި ރަޖިސްޓްރީވުމަށް އިލްތިމާސްކޮށްފި

ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކުގެ ތެރެއިން ޓީޖީއެސްޓީ ދައްކާ ފަރާތްތަކަށް ވީހާވެސް އަވަހަކަށް އެމްއެމްއޭގައި ރަޖިސްޓްރީވުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިލްތިމާސްކޮށްފިއެވެ.

މިއީ ބޭރުފައިސާއާ ބެހޭ ގަވާއިދުގެ ދަށުން ކުރަންޖެހޭ ކަމެކެވެ.

އެމްއެމްއޭއިން މަޢުލޫމާތު ދެއްވާފައިވާ ގޮތުގައި، އޮންލައިންކޮށް ރަޖިސްޓްރީވާން ބޭނުންވާ ފަރާތްތަކަށް އެމްއެމްއޭ އެފްއެކްސް ރެޖިސްޓްރޭޝަން ޕޯޓަލް މެދުވެރިކޮށް ރަޖިސްޓްރީ ވެވޭނެއެވެ. މި ގަވާއިދުގެ ދަށުން މަރުކަޒީ ބޭންކުގައި ރަޖިސްޓްރީ ވާން ޖެހޭ އެންމެ ފަހު ތާރީޚަކީ މިހިނގާ އޮކްޓޯބަރުމަހުގެ 30 ވަނަ ދުވަހެވެ.

މިއާއެކު، މަރުކަޒީ ބޭންކުން ވަނީ މިހިނގާ އޮކްޓޯބަރުމަހުގެ އެއްވަނަ ދުވަހުން ފެށިގެން، ރާއްޖޭގައި ހިންގާ ޓޫރިޒަމް ވިޔަފާރިތަކުން ރާއްޖޭގެ ބޭންކްތަކަށް ޑޮލަރު މާރުކުރުން ލާޒިމްވާގޮތަށް އައު އުސޫލެއް އެކުލަވާލާފައެވެ. މި އުސޫލުގެ ދަށުން، ޓޫރިޒަމް ވިޔަފާރިކުރާ ތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރުމަށް ލާޒިމްކޮށްފައިވެއެވެ.

އެމްއެމްއޭއިން ކަނޑައަޅާފައިވާ ގޮތުގައި، ކެޓަގަރީ އޭގައި ހިމެނޭ ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް އެފަދަ ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހޭނެއެވެ. އަދި ކެޓަގަރީ ބީގައި ހިމެނޭ 50 ކޮޓަރި ނުވަތަ އެއަށްވުރެ މަދުން ކޮޓަރި ހުންނަ ތަންތަނުން މާރުކުރަންޖެހޭ އަދަދަކީ ޓޫރިސްޓަކަށް 25 ޑޮލަރެވެ.

އެމްއެމްއޭއިން އިތުރަށް ހާމަކޮށްފައިވާ ގޮތުގައި، ވަކި ހާލަތްތަކެއްގައި މިއަށް ވުރެ މަދުން މާރުކުރުމުގެ ހުއްދައަށް އޮތޯރިޓީގައި އެދެވިދާނެއެވެ. މިފަދަ ހާލަތްތަކުގެ ތެރޭގައި ބޭރުފައިސާއިން ޓެކްސް ދެއްކުމާއި، މާލީ އިދާރާއަކަށް ބޭރުފައިސާއިން ދަރަނި ދެއްކުމާއި، ކޯޓު ހުކުމަކުން ކަނޑައަޅާފައިވާ ބޭރުފައިސާގެ އިލްތިޒާމްތަކާއި އަދި އޮތޯރިޓީން ހުއްދަދޭ އެހެނިހެން ބޭރު ފައިސާގެ އިލްތިޒާމްތައް ހިމެނެއެވެ.