އިންޑިއާގެ އެންމެ ބޮޑު އެއް ކުންފުނީގެ 290 މުވައްޒަފުން ޗުއްޓީހޭދަކޮށްލުމަށް ރާއްޖޭއަށް

އިންޑިއާގެ ބޮޑު ވިޔަފާރި ކުންފުންޏެއް ކަމަށްވާ ރިލަޔަންސް ގްރޫޕުގެ 290 މުވައްޒަފުން ރާއްޖެއަށް ޗުއްޓީ ހޭދަކުރުމަށް މިއަދު އައިސްފިއެވެ.

މި މުވައްޒަފުން ރާއްޖެ އައިސްފައިވަނީ ސްރީލަންކަން އެއަރލައިންސްގެ ދެ ފްލައިޓެއްގައެވެ.

ސްރީލަންކަން އެއަރލައިންސްގެ ރާއްޖޭގެ އެޖެންޓް އިނާ މޯލްޑިވްސްގެ މެނޭޖިންގ ޑިރެކްޓަރު މުޙައްމަދު ފިރާގު މަޢުލޫމާތު ދެއްވިގޮތުގައި، މި ގްރޫޕުން ޗުއްޓީ ހޭދަކުރާނީ ރ. އަތޮޅުގައި ހިންގާ ރާޔާ ބައި އެޓްމޮސްފިއާ ރިސޯޓުގައެވެ. އަދި މިއީ ރިލަޔަންސް ގްރޫޕުގެ އެތެރޭގެ ހަފްލާއަކަށް ރާއްޖެ އައި ދަތުރެކެވެ.

ފިރާގު ވިދާޅުވިގގޮތުގައި، ރާއްޖެ-އިންޑިއާގެ ނުތަނަވަސްކަމަށް ފަހު އިންޑިއާއިން ރާއްޖެ އަންނަ ޓޫރިސްޓުން މަދުވުމަށް ފަހު އިންޑިއާގެ ކުންފުންޏެއްގެ ބޮޑު ގްރޫޕެއް ރާއްޖެ އައި މިއީ ފުރަތަމަ ފަހަރެވެ. މިކަމުން ދޭހަކޮށްދެނީ އިންޑިއާގެ ރައްޔިތުންގެ މެދުގައި ރާއްޖޭގެ މަޤްބޫލުކަން އަލުން އިތުރުވަމުންދާކަމެވެ.

"މިއީ އިންޑިއާ މާކެޓް ރަނގަޅުވާކަމުގެ ވަރަށް ބޮޑު ހެއްކެއް މިވަރުގެ ބޮޑު ގްރޫޕެއް ރާއްޖެ އައުމަކީ،" ފިރާގު ވިދާޅުވިއެވެ. އަދި އިންޑިއާ މާކެޓު ރަނގަޅުވުމުގެ ކޮޅުމަތި ފެންނާތީ އަންނަ އަހަރު އިންޑިއާ މާކެޓް އަނެއްކާވެސް ރަނގަޅުވާނޭ ކަމަށް އޭނާ އަންދާޒާ ކުރައްވައެވެ.

މިއަހަރު ރާއްޖެ އައި ޓޫރިސްޓުންގެ އަދަދު މިދިޔަ އަހަރާ އަޅާބަލާއިރު 10 އިންސައްތަ އިތުރުވެ، 1.5 މިލިއަނަށް ވުރެ ގިނަ ޓޫރިސްޓުން ވަނީ އައިސްފައެވެ. ނަމަވެސް މިދިޔަ އަހަރު އެންމެ މަތީގައި އޮތް އިންޑިއާ މާކެޓް ވަނީ މިހާރު ހަ ވަނައަށް ވެއްޓިފައެވެ. އިންޑިއާއިން ރާއްޖެ އައި ޓޫރިސްޓުންގެ އަދަދަކީ މިދިޔަ އަހަރާ އަޅާބަލާއިރު 100,000 ޓޫރިސްޓުންނަށް ވުރެ މަދު އަދަދެކެވެ.

މިފަހުން ރައީސް މުޙައްމަދު މުޢިއްޒު އިންޑިއާއަށް ކުރެއްވި ދަތުރުފުޅަށް ފަހު ރާއްޖެ-އިންޑިއާގެ ގުޅުން އަނެއްކާވެސް ވަނީ ރަނގަޅުވެފައެވެ. އަދި އެ ދަތުރުފުޅުގައި ރައީސް ވަނީ ރާއްޖޭގެ ޓޫރިޒަމް ޕްރޮމޯޓް ކުރުމުގެ ބައެއް ހަރަކާތްތަކުގައި ބައިވެރިވެ ވަޑައިގެން ޓުއަރިޒަމް ދާއިރާގެ ފަރާތްތަކާވެސް ބައްދަލުކުރައްވާފައެވެ.