ރައީސް މުއިއްޒުގެ އައު ވަޒީރުންނަށް މަޖިލީހުގެ ކޮމިޓީން ރުހުންދީފި

ރައީސް ޑރ. މުހައްމަދު މުއިއްޒު ފަހުން ކެބިނެޓަށް ގެންނެވި ބަދަލުގައި އައްޔަންކުރެއްވި ތިން އައު ވަޒީރުންނަށް ރުހުން ދިނުމަށް ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ނިންމައިފިއެވެ.

މި ތިން ވަޒީރުންނަކީ އައު ފިނޭންސް މިނިސްޓަރު މޫސާ ޒަމީރު، އައު ފޮރިން މިނިސްޓަރު ޑރ. އަބްދުﷲ ޚަލީލް، އަދި އައު ހެލްތު މިނިސްޓަރު އަބްދުﷲ ނާޒިމް އިބްރާހީމްއެވެ.

ކޮމިޓީން މި ވަޒީރުންގެ މައްސަލައެއް އޮތްތޯ ބެލުމަށް އެންޓި ކޮރަޕްޝަން ކޮމިޝަނާއި ޖުޑިޝަލް އެޑްމިނިސްޓްރޭޝަން އަދި މޯލްޑިވްސް ކަރެކްޝަނަލް ސާވިސްއާ މަޝްވަރާކޮށް މަޢުލޫމާތު ސާފުކުރިއެވެ. އެ އިދާރާތަކުން މައްސަލައެއް ނެތްކަމަށް އެންގުމާ ގުޅިގެން، ކޮމިޓީގައި ބައިވެރިވި މެންބަރުންގެ އިއްތިފާގުން ވަނީ ތިން ވަޒީރުންނަށްވެސް ރުހުން ދިނުމަށް ނިންމާފައެވެ.

ރައީސް މުއިއްޒު ވަޒީރުންގެ މަޖިލިހަށް މި ބަދަލުތައް ގެންނެވީ ސެޕްޓެމްބަރު 30 ވަނަ ދުވަހުއެވެ. އަދި ވަޒީރުންނަށް ރުހުން ހޯދުމަށް ކޮމިޓީއަށް ފޮނުވާފައިވަނީ މި މަހުގެ 14 ވަނަ ދުވަހުކަން ވެސް ފާހަގަކޮށްލެވެއެވެ.