ހުއްދަ ނެތި ބޮޑުހިލަ ޖެހުމުން ހުރަވަޅި ރިސޯޓު 20،000 ރުފިޔާއިން ޖޫރިމަނާކޮށްފި

ހުރަވަޅި ބީޗް ރިސޯޓު

ހުއްދަ ނުހޯދައި ރަށުގައި ބޮޑުހިލަ ޖެހުމުން ހުރަވަޅި ބީޗް ރިސޯޓު 20،000 ރުފިޔާއިން ޖޫރިމަނާކޮށްފިއެވެ.

އެންވަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ބުނީ، ރިސޯޓުން ބޮޑުހިލަ ޖަހާފައިވަނީ ރަށުގެ އިރުމަތީ ފަރާތުން ފަޅު ތެރޭގައި ކަމަށެވެ.

އީޕީއޭ އިން އިތުރަށް ބުނެފައިވަނީ، މި މަސައްކަތް ކުރިއަށް ގެންގޮސްފައިވަނީ ތިމާވެއްޓަށް އަސަރު ކުރާނެ މިންވަރު ދަނެގަންނަ ރިޕޯޓު (އީއައިިއޭ) ނުހަދައި ކަމަށެވެ. އަދި މިހާ ކުޑަ އަދަދަކުން ޖޫރިމަނާ ކޮށްފައިވަނީ، މިއީ އެ ރިސޯޓުން މިފަދަ ކުށެއް ކުރި ފުރަތަމަ ފަހަރު ކަމަށްވާތީ ކަމަށްވެސް އީޕީއޭ އިން ބުނެފައިވެއެވެ.

މި މައްސަލައިގައި ހުރަވަޅި ރިސޯޓު ޖޫރިމަނާ ކުރީ މިދިޔަ ހޯމަ ދުވަހުއެވެ. އަދި ޖޫރިމަނާގެ ފައިސާ 30 ދުވަހުގެ ތެރޭގައި ދެއްކުމަށް އެ ރިސޯޓަށް އަންގާފައިވާ ކަމަށް އީޕީއޭ އިން މައުލޫމާތު ދީފައިވެއެވެ.

ހުރަވަޅި ރިސޯޓަކީ ޗަމްޕާ މުހައްމަދު މޫސާ (އުއްޗު) ގެ ރިސޯޓެކެވެ.

އީޕީއޭ