ސަރުކާރުގެ ކުންފުނިތަކާއި ސިޔާސީ މުވައްޒަފުންގެ މުސާރަ ކުޑަކުރަން ނިންމައިފި

ދައުލަތުގެ މުސާރަތައް ކުޑަކުރުމަށް ރައީސުލްޖުމުހޫރިއްޔާ ޑރ މުހައްމަދު މުއިއްޒު ނިންމަވައި، އެކަން ތަންފީޒުކުރަން އަންގަވައިފި އެވެ.

މިގޮތުން ކުރިއަށް އޮތް ދެ އަހަރު ދުވަހުގެ މުއްދަތަށް މުސާރަތަކުގެ ޚަރަދު ކުޑަކުރުމަށް އަޅާނެ ފިޔަވަޅުތައް މިރޭ އެމަނިކުފާނު ވަނީ އިޢުލާނު ކުރައްވާފައެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އަންނަ އަހަރުގެ ބަޖެޓް ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން ދައުލަތުގެ ޚަރަދުތައް ކުޑަކުރުމަށް ގިނަ ފިޔަވަޅުތަކެއް އަޅާނެ ކަމަށެވެ. މި ފިޔަވަޅުތަކުގެ ތެރޭގައި ހިމެނެނީ:

- ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން %10 އިންސައްތަ އުނިކުރުން

- ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން %10 އިންސައްތަ އުނިކުރުން

- ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90,000 ރުފިޔާ ކަމަށް ކަނޑައެޅުން

- ޝަރުޢީ ދާއިރާގެ އިސްވެރިންން އަދި ރައްޔިތުންގެ މަޖިލީހުގެ މެންބަރުންގެ މުސާރައިން %10 އިންސައްތަ އުނިކުރުމަށް އެ ފަރާތްތަކުގައި އެދުން

މީގެ އިތުރުން، މިނިވަން މުއައްސަސާތަކުގެ އިސްވެރިންގެ މުސާރައިން %10 އިންސައްތަ އުނިކުރުމަށް އެ ފަރާތްތަކަށް ދަންނަވާނެ ކަމަށްވެސް ރައީސް ވިދާޅުވެފައިވެ އެވެ. ނަމަވެސް، 12,000 ރުފިޔާއިން ފެށިގެން ދަށުގެ މުސާރަ ލިބޭ ފަރާތްތަކުގެ މުސާރައަށް އެއްވެސް ބަދަލެއް ނުގެންނާނެ ކަމަށް ރައީސް ވަނީ އިޢުލާންކުރައްވާފަ އެވެ.

މި ފިޔަވަޅުތައް އަޅަން ނިންމާފައިވަނީ ރާއްޖޭގެ މާލީ ހާލަތު ދަށްވެފައިވާތީ އެވެ. ވޯލްޑް ބޭންކުގެ ތަފާސްހިސާބުތަކުން ދައްކާ ގޮތުގައި ރާއްޖޭގެ ދަރަންޏާއި ދައުލަތުން ސޮވެރިން ގެރެންޓީ ދީފައިވާ ދަރަނީގެ ޖުމުލަ 8.2 ބިލިއަން ޑޮލަރަށް އަރައެވެ. މިއީ ރާއްޖޭގެ އުފެއްދުންތެރިކަމުގެ ނިސްބަތުން %116 އިންސައްތަ  އާ އެއްވަރުގެ އަދަދެކެވެ.