ގޭބީސީތަކަށް ކައްކާ ގޭސް ލިބުމުގައި ދަތިކަމެއް ނެތް: މޯލްޑިވް ގޭސް

މޯލްޑިވްސް ގޭސް

މޯލްޑިވް ގޭސްގެ މެނޭޖިންގ ޑިރެކްޓަރު އަބްދުﷲ މުޙައްމަދު މިއަދު ވިދާޅުވެފައިވަނީ އާންމު ގޭބީސީތަކަށް ކައްކާ ގޭސް ލިބުމުގައި އެއްވެސް ދަތިކަމެއް ނެތް ކަމަށެވެ.

އަބްދުﷲ ވިދާޅުވީ 2 ކިލޯ، 5 ކިލޯ އަދި 10 ކިލޯގެ ގޭސް ފުޅިތައް ލިބުމުގައި އެއްވެސް މައްސަލައެއް ނެތް ކަމަށެވެ. އެހެންނަމަވެސް 45 ކިލޯގެ ގޭސް ފުޅިތަކުގެ ކުޑަ ޝޯޓޭޖެއް ހުރި ކަމަށް އޭނާ ފާހަގަކުރެއްވިއެވެ.

އަބްދުﷲ ވިދާޅުވީ މާދަމާ އައު ގޭސް ޝިޕްމަންޓެއް ރާއްޖެ އަންނާނެ ކަމަށާއި، އޭގެ ފަހުން މެންދުރުން ފެށިގެން 45 ކިލޯގެ ގޭސް ފުޅިތައް ވެސް ލިބުމުގައި ދަތިކަމެއް ނުހުންނާނެ ކަމަށެވެ.

ގޭސް ޝިޕްމަންޓު ލަސްވެފައިވަނީ ސަޕްލަޔަރުގެ ފަރާތުން ދިމާވި ލަސްކަމެއްގެ ސަބަބުން ކަމަށް އަބްދުﷲ ވިދާޅުވިއެވެ. އަދި މި ލަސްކަމަކީ މޯލްޑިވް ގޭސްގެ މާލީ ދަތިކަމެއްގެ ސަބަބުން ދިމާވި ކަމެއް ނޫން ކަމަށާއި، މި އަހަރު ކުންފުންޏަށް 30 އިންސައްތައިގެ މާލީ ކުރިއެރުމެއް ލިބިފައިވާ ކަމަށް ވެސް އޭނާ ފާހަގަކުރެއްވިއެވެ.

މޯލްޑިވް ގޭސްއަށް ގޭސް ސަޕްލައި ކުރަނީ ހުޅުވާލެވިފައިވާ ބިޑަކުން ހޮވޭ ފަރާތަކުން ކަމަށާއި، މިހާރު ގޭސް ގެންނަނީ ދުބާއީގެ ކުންފުންޏަކުން ކަމަށް މޯލްޑިވް ގޭސްއިން މަޢުލޫމާތު ދީފައިވެއެވެ.

މޯލްޑިވް ގޭސް