ޑެޕިއުޓީ ކޮމިޝަނަރ އޮފް ޓެކްސޭޝަންގެ މަޤާމަށް ދެ ބޭފުޅެއްގެ ނަން މަޖިލީހަށް ފޮނުވައިފި

މީރާ

ޑެޕިއުޓީ ކޮމިޝަނަރ އޮފް ޓެކްސޭޝަންގެ މަޤާމަށް އައްޔަން ކުރުމަށް ދެ ބޭފުޅެއްގެ ނަން ރައީސް ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ފޮނުއްވައިފިއެވެ.

މި މަޤާމަށް ކުރިމަތިލެއްވި ދެ ބޭފުޅުންނަކީ ފާޠިމަތު އަމީޒާ (ކޯޒީރައުންޑް / ގދ. ގައްދޫ) އާއި މިހާރު އެ މަޤާމުގައި ހުންނެވި އަސްމާ ޝަފީޢު (ވައިޖެހޭގެ / ހއ. އިހަވަންދޫ) އެވެ.

ރައީސް އޮފީހުން މަޖިލީހަށް ފޮނުއްވި ސިޓީފުޅުގައި ވަނީ މި ދެ ބޭފުޅުންގެ ނަން ދިރާސާކޮށްދެއްވުމަށް އެދިވަޑައިގެންފައެވެ. މި މައްސަލަ ދިރާސާކުރުމަށް މިހާރު ވަނީ މަޖިލީހުގެ އިޤްތިޞާދީ ކޮމިޓީއަށް ފޮނުވާފައެވެ.

މި މަޤާމަށް ކުރިމަތިލުމުގެ ފުރުޞަތު ހުޅުވާލާފައިވަނީ މި މަހުގެ 3 ވަނަ ދުވަހުއެވެ. މިހާރު މި މަޤާމުގައި ހުންނެވި އަސްމާ ޝަފީޢުގެ މުއްދަތު ހަމަވާނީ މި މަހުގެ 31 ވަނަ ދުވަހުއެވެ. އަސްމާ މި މަޤާމަށް އައްޔަންކުރެވިފައިވަނީ 2019 ވަނަ އަހަރުއެވެ.

އަސްމާ ޝަފީޢު ވަނީ 1999 ވަނަ އަހަރުން ފެށިގެން އޮޑިޓާއި އެކައުންޓިންގއާ ގުޅޭ އެކި މަޤާމުތަކުގައި ޚިދުމަތްކުރައްވާފައެވެ. މީގެ ކުރިން އޭނާ ވަނީ މީރާގެ ޑިރެކްޓަރ ޖެނެރަލް، ޕްލޭނިންގ އެންޑް ޑިވެލޮޕްމަންޓްގެ މަޤާމުވެސް އަދާކުރައްވާފައެވެ.

މި މަޤާމަށް ހޮވޭ ފަރާތެއް ކަނޑައެޅުމަށްޓަކައި މަޖިލީހުގެ އިޤްތިޞާދީ ކޮމިޓީން ދެ ކެންޑިޑޭޓުންގެ ނަންތައް ދިރާސާކުރުމަށްފަހު، އެ ކޮމިޓީގެ ނިންމުން މަޖިލީހުގެ ތަޅުމަށް ހުށަހަޅައި، މަޖިލީހުގެ މެންބަރުން ވޯޓުލައްވައިގެން ފާސްކުރައްވާނެ ކަމަށް ބެލެވެއެވެ.

ރައްޔިތުންގެ މަޖިލިސް ރައީސް އޮފީސް މީރާ