ޣައްޒާގައި ޝަހީދުވި މީހުންގެ އަދަދު 42،700 އަށް އަރައިފި

އިޒްރާއީލުން ޣައްޒާގައި ހިންގަމުންދާ އަނިޔާވެރި ޙަމަލާތަކުގައި ޝަހީދުވި މީހުންގެ އަދަދު 42،700 އަށް އަރައިފިކަމަށް ޣައްޒާގެ ޞިއްޙީ ވުޒާރާއިން މިއަދު ހާމަކޮށްފިއެވެ.

އެ ވުޒާރާއިން ބުނާ ގޮތުގައި ފާއިތުވި 24 ގަޑިއިރު ތެރޭގައި އިތުރު 115 ފަލަސްޠީނު ރައްޔިތުން ވަނީ ޝަހީދުވެފައެވެ.

ޞިއްޙީ ވުޒާރާއިން އިތުރަށް ހާމަކުރި ގޮތުގައި، އިޒްރާއީލުގެ ޙަމަލާތަކުގައި ޒަޚަމްވި މީހުންގެ އަދަދު މިހާރު ވަނީ 100،282 އަށް އަރާފައެވެ. ވޭތުވެދިޔަ 48 ގަޑިއިރު ތެރޭގައި އާއިލާތަކަށް އަމާޒުކޮށް ހިންގި އަނިޔާވެރި ހަތް ޙަމަލާގައި 487 މީހުން ޒަޚަމްވެފައިވާ ކަމަށްވެސް އެ ވުޒާރާއިން ބުންޏެވެ.

"ގިނަ އަދަދެއްގެ މީހުން އަދިވެސް ވަނީ ޢިމާރާތްތަކުގެ ދަށުގައި އަދި މަގުމަތީގައި ތާށިވެފައި. ސަލާމަތްކުރާ ފަރާތްތަކަށް އެ މީހުންނާ ހަމައަށް ވާޞިލުވެވޭ ގޮތެއް ނުވޭ،" ޞިއްޙީ ވުޒާރާގެ ބަޔާނުގައި ބުނެފައިވެއެވެ.

އދ. ގެ ސަލާމަތީ މަޖިލީހުން ވަގުތުން ހަނގުރާމަ ހުއްޓާލުމަށް ގޮވާލާފައިވީ ނަމަވެސް، އިޒްރާއީލުން އަންނަނީ އެ ގޮވާލުމާ ޚިލާފަށް، ޣައްޒާގެ މައްޗަށް ދޭ އަނިޔާވެރި ޙަމަލާތައް ކުރިއަށް ގެންދަމުންނެވެ. މިކަމުގެ ސަބަބުން ޣައްޒާގެ ގާތްގަނޑަކަށް މުޅި އާބާދީ ވަނީ ނިކަމެތިކަމުގެ ތެރެއަށް ވެއްޓިފައެވެ.

ކާބޯތަކެއްޗާއި، ސާފު ފެނާއި، ބޭސްފަރުވާގެ ޚިދުމަތްތައް ލިބުމުގައި ބޮޑެތި ދަތިތަކެއް ކުރިމަތިވެފައިވާ ކަމަށް އެ ސަރަހައްދުގެ އިންސާނީ ޙައްޤުތަކަށް މަސައްކަތްކުރާ ޖަމްޢިއްޔާތަކުން ބުނެއެވެ.