ހުޅުމާލޭ ޕެޓްކެއަރ ފެސިލިޓީއަށް ވެޓެރިނަރީ ނަރުހުން ހޯދަނީ

މާލެސިޓީ ކައުންސިލުން ހުޅުމާލޭގައި ޤާއިމްކުރާ ޕެޓްކެއަރ ފެސިލިޓީއަށް ގެންނަ ބުޅާތަކަށް ފަރުވާދިނުމަށް ދެ ވެޓެރިނަރީ ނަރުހުން ހޯދުމަށް އިއުލާނުކޮށްފިއެވެ.

މި މަޤާމަށް ހޮވޭ ފަރާތްތަކުގެ މުސާރައަކީ 8،130 ރުފިޔާ ކަމަށާއި، އިތުރު އެލަވަންސްތަކާއެކު މަހެއްގެ މައްޗަށް 10،000 ރުފިޔާއަށްވުރެ ގިނައިން ލިބޭނެއެވެ.

މި ވަޒީފާގެ މަސްއޫލިއްޔަތުތަކުގެ ތެރޭގައި ޕެޓްކެއަރ ފެސިލިޓީއަށް އަންނަ ފަރާތްތަކަށް ޚިދުމަތް ދިނުމާއި، އާންމު ޗެކަޕްތަކާއި ފަރުވާތަކުގައި ވެޓެރިނޭރިއަންއަށް އެހީތެރިވުން ހިމެނެއެވެ. މީގެ އިތުރުން ބުޅަލަށް ބޭސް ދިނުމާއި، ލޭ ނެގުމާއި، އެކިއެކި ޓެސްޓުތައް ކުރުމާއި، އޮޕަރޭޝަނަށްފަހު ރިކަވަރީގައި ތިބޭ ބުޅާތަކަށް ބޭނުންވާ ފަރުވާ ދިނުންވެސް ހިމެނެއެވެ.

މާލެސިޓީ ކައުންސިލުން ވަނީ ވެޓެރިނަރީ ނަރުހުންގެ އިތުރުން ވެޓެރިނޭރިއަނެއްވެސް ހޯދުމަށް އިއުލާނުކޮށްފައެވެ. ވެޓެރިނޭރިއަނެއްގެ މުސާރައިގެ ގޮތުގައި ކަނޑައަޅާފައިވަނީ 35،000 ރުފިޔާއެވެ. މި ފެސިލިޓީއަށް އަންނަ މަހުގެ ތެރޭގައި ބުޅާތައް ގެންދެވޭނެ ކަމަށް މޭޔަރު އާދަމް އާޒިމް ވިދާޅުވެފައިވެއެވެ.

ހުޅުމާލޭގައި ކެޓްޝެލްޓާ ގާއިމްކުރުމުގެ އަމަލީ މަސައްކަތް ފަށާފައިވަނީ މިއަހަރުގެ މާޗްމަހުގެ ތެރޭގައެވެ. މި ފެސިލިޓީ ހެދުމަށް އެޗްޑީސީން މާލެ ސިޓީ ކައުންސިލަށް ހުޅުމާލެ ދެވަނަ ފިޔަވަހިން 5،000 އަކަފޫޓުގެ ބިމެއް ދީފައިވާއިރު، ހުޅުމާލެ ފަރުކޮޅުފުށި ސަރަހައްދުގައި ބިނާ ކުރާ މި ފެސިލިޓީގެ މަސައްކަތް އެއްކޮށް ނިމޭއިރު އެކި ވައްތަރުގެ ޕެޓް ކެއާ ޕެސިލިޓީއެއް ވެސް އެތަނުގައި ހަދާނެ ކަމަށް މާލެ ސިޓީ ކައުންސިލުން ބުނެފައިވެއެވެ.