ހަނިގޮތަކަށް އާސެނަލް މޮޅުވި މެޗުގައި ކަލަފިއޯރީއަށް އަނިޔާވެއްޖެ

ޔުއެފާ ޗެމްޕިއަންްސް ލީގުގައި ރޭ އަމިއްލަ ދަނޑުގައި ޔޫކްރެއިންގެ ޝަހުތަރު ޑޮނެސްކް އަތުން ހަނިގޮތަކަށް  1-0 އިން އާސެނަލް މޮޅުވި މެޗުގައި އެ ޓީމުގެ އިޓަލީ ޑިފެންޑަރު، ރިކާޑޯ ކަލަފިއޯރީ އަށް އަނިޔާވެއްޖެ އެވެ.

އާސެނަލް ރޭ މޮޅުވީ ޝަހުތަރުގެ ގޯލްކީޕަރު، ޑިމިޓްރޯ ރިޒްނީކް އަތުން ބައިކޮޅަށް ވަން ގޯލުންނެވެ. އާސެނަލްގެ ގަބްރިއެލް މާޓިނެލީ ޖެހި ބޯޅައެއް ދަނޑީގައި ޖެހިފައި ގޯލަށް ވަނީ ކީޕަރު ރިޒްނީކް ގައިގައި ޖެހިފަ އެވެ.

ފަންސާސް މިލިއަން ޑޮލަރުގެ ޑީލެއްގައި އާސެނަލަށް ސޮއިކުރި ކަލަފިއޯރީ އެ ކްލަބްގެ ޖޯޒީގައި ހަތް ވަނަ މެޗު ފުރަތަމަ އެގާރައިގައި ހިމެނިގެން ކުޅުނުއިރު، ރޭގެ މެޗުގައި އޭނާގެ ކަކުލަށް އަނިޔާވެގެން، ބަދަލުކުރަން ޖެހުނީ އިތުރަށް ދަނޑުމަތީގައި ނުހުރެވިގެން މެޗުގެ ދެވަނަ ހާފުގައެވެ.

މެޗަށް ފަހު، އާސެނަލްގެ ކޯޗު މިކޭލް އާޓެޓާ ބުނީ ކަލަފިއޯރީގެ އަނިޔާއާ ބެހޭގޮތުން ސީދާ އެއްޗެއް ބުނެވޭނީ ޓެސްޓްތަކަށް ފަހު ކަމަށާއި، ެވަގުތަށް ފެނުނު މަންޒަރުތަކަށް ބަލާއިރު އޭނާގެ އަނިޔާ "ސީރިއަސް" ކަމަށެވެ.  

މި ވަގުތު އާސެނަލް ޓީމަށް އަނިޔާގެ މައްސަލަ ކުރިމަތިވެފައިވާއިރު، ކެޕްޓަން މާޓިން އޮޑެގާޑްގެ އިތުރުން ބުކާޔޯ ސަކާ އަދި ޖޫރިއަން ޓިމްބާ އަންނަނީ ފަރުވާ ހޯދަމުންނެވެ. އިނގިރޭސި ޕްރިމިއާ ލީގުގައި ދެން ކުޅޭ މެޗުގައި އަމިއްލަ ދަނޑުގައި ލިވަޕޫލާ ކުޅޭއިރު، އާސެނަލްގެ ޑިފެންޑަރު، ވިލިއަމް ސަލީބާ ހުރީ އެންމެ ފަހުން ލީގު މެޗުގައި ދެއްކި ރަތް ކާޑުގެ ސަބަބުން ސަސްޕެންޝަނެއްގަ އެވެ.

މި ކުޅުންތެރިން އަނިޔާގައި ތިބުމުން އެންމެފަހުން ލީގުގައި އެޓީމުން ކުޅުނު މެޗުތަކުގައި އެތަން ވަރަށް ބޮަޑަށް ދައްކާފައިވަކަން ފާހަގަކުރެވެއެވެ