ގޭންގު ކުށްތައް ހުއްޓުވުމަށް އައު ބިލެއް މަޖިލީހަށް ހުށަހެޅުމަށް ތައްޔާރު

ގޭންގުގެ މައްސަލައަކީ ރާއްޖޭގައި ބޮޑު މައްސަލައެއް

ރާއްޖޭގައި އިތުރުވަމުންދާ ގޭންގު ކުށްތައް ހުއްޓުވުމަށް ޚާއްޞަ ބިލެއް ރައްޔިތުންގެ މަޖިލީހަށް ހުށަހެޅުމުގެ މަސައްކަތް ކުރިއަށްދާ ކަމަށް ހޯމްލޭންޑް މިނިސްޓަރު އަލީ އިހުސާން މިއަދު ހާމަކުރައްވައިފިއެވެ. މި ބިލަކީ ގޭންގުތަކުގެ ބާރު ކަނޑުވާލުމަށް އަމާޒުކޮށްގެން އެކުލަވާލާފައިވާ ބިލެކެވެ.

"ގޭންގު ކުށްތައް ހުއްޓުވުމުގެ ޤާނޫނު" ގެ ނަމުގައި ޑްރާފްޓްކޮށްފައިވާ މި ބިލުގައި، ގޭންގެއް ކަމަށް ކަނޑައަޅާނެ މިންގަނޑުތަކާއި، ގޭންގު ކުށްތަކުން ހޯދާ މުދަލާއި ފައިސާ ދައުލަތަށް ނެގުމާއި، ގޭންގު ކުށްތަކުގެ އަދަބު ފަދަ ގިނަ ކަންތައްތަކެއް ހިމެނިފައިވެއެވެ.

މި ބިލުގެ އެންމެ މުހިންމު އެއް މާއްދާއަކީ ގޭންގު މެންބަރެއް ކަމަށް ކަނޑައެޅޭ މީހުންނަށް ދައުލަތުގެ ވަޒީފާ ނުދިނުމާއި، އިންތިޚާބީ މަޤާމުތަކުން ވަކިކުރުމާއި، މަޤާމުތަކަށް ކުރިމަތިނުލެވުމެވެ. މީގެ އިތުރުން، ގޭންގުތައް ހުއްޓުވުމަށް ފުލުހުންނަށް ބޮޑެތި ބާރުތަކެއް ދިނުމަށްވެސް މި ބިލުގައި ހިމަނާފައިވެއެވެ.

މިނިސްޓަރު އިހުސާން ވިދާޅުވި ގޮތުގައި، މި ބިލު މިހާރު ވަނީ އެޓާނީ ޖެނެރަލްގެ އޮފީހަށް ފޮނުވާފައެވެ. އަދި މަޖިލީހުގެ މި ދައުރުގެ ތެރޭގައި މި ބިލު މަޖިލީހަށް ހުށަހެޅި، ޤާނޫނަކަށް ހެދުމަށް މަސައްކަތްކުރަމުންދާ ކަމަށް އޭނާ ހާމަކުރެއްވިއެވެ. މި ބިލު ފާސްވުމުން، ރާއްޖޭގެ މަގުތަކުގެ ސަލާމަތާއި ރައްކާތެރިކަން އިތުރުވެ، ގޭންގު ކުށްތައް މަދުވާނެ ކަމަށް ސަރުކާރުން އުންމީދުކުރެއެވެ.

މިނިސްޓަރ އިޙްސާން ފުލުހުން