ބިދޭސީންގެ ފީ ނުދައްކާ ފަރާތްތަކުގެ ލިސްޓު އާންމުކުރުމުން އެއް ބިލިއަން ރުފިޔާ ހޯދިއްޖެ

ވަޒީފާ އަދާކުރާ ބިދޭސީންގެ ފީ ނުދައްކާ ތިބި ވަޒީފާދޭ ފަރާތްތަކުގެ ލިސްޓު އާންމުކުރުމުން، ނުދައްކާ ހުރި 1.7 ބިލިއަނަށް ވުރެ ގިނަ ރުފިޔާގެ ތެރެއިން 1 ބިލިއަން ރުފިޔާ ހޯދިފައިވާ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.

މިނިސްޓަރު އިހުސާން ވިދާޅުވީ، ލިސްޓުގައިވާ ފައިސާ ނުދައްކާ ފަރާތްތައް މިހާރު އެކްސްޕެޓް ސިސްޓަމުން ބްލޮކްކޮށްފައިވާ ކަމަށާއި، އެ ފަރާތްތަކަށް ޚިދުމަތް ދިނުން ހުއްޓާލާފައިވާ ކަމަށެވެ. އަދި ދެން ޚިދުމަތް ލިބޭނީ ފައިސާ ދެއްކުމުން ކަމަށްވެސް އޭނާ ވިދާޅުވިއެވެ.

ބިދޭސީ މަސައްކަތްތެރިންގެ ފީ ނުދައްކާ 100,000 ރުފިޔާއަށް ވުރެ ބޮޑު އަދަދެއް އަރާފައިވާ ވަޒީފާދޭ ފަރާތްތަކުގެ ލިސްޓު އާންމުކުރީ މިދިޔަ ޖުލައި މަހުގެ 24 ވަނަ ދުވަހުއެވެ. މިނިސްޓްރީން ލިސްޓު ނެރުމުގެ ކުރިން ފައިސާ ނުދައްކާ ފަރާތްތަކަށް އަންގާފައި ވަނީ ދެ ހަފްތާ ތެރޭ ފައިސާ ދައްކާ ޚަލާޞް ކުރުމަށެވެ.

ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމުގައި މިނިސްޓަރު އިހުސާން އިތުރަށް ވިދާޅުވީ، މިހާރު ނުލިބިވަނީ އެންމެ 7 މިލިއަން ރުފިޔާ ކަމަށެވެ.

ބިދޭސީންގެ މައްސަލަ ހައްލުކުރުމަށް މިފަހުން ވަނީ ލޭބަރ ރިލޭޝަންސް އޮތޯރިޓީ ހޯމްލޭންޑް ސެކިއުރިޓީ މިނިސްޓްރީގެ ދަށަށް ބަދަލުކޮށްފައެވެ. މިގޮތަށް ނިންމީ ގަވާއިދާ ޚިލާފަށް ރާއްޖޭގައި އުޅެމުންދާ ބިދޭސީންގެ މައްސަލަ ހައްލުކުރުމަށް ފިޔަވަޅު އެޅުން ހަރުދަނާ ކުރުމުގެ ގޮތުންނެވެ.