މަސްތުވާތަކެތީގެ ވަބާގައި ޖެހުނު ޒުވާނުންނަށް އަމާޒުކޮށް ރިމާންޑް ސެންޓަރު އަލުން ހުޅުވައިފި

މާލޭގެ މަގުތަކުގައި އުޅޭ މަސްތުވާތަކެތީގެ ވަބާގައި ޖެހިފައިވާ ޒުވާނުން ހޯދައި، ރިމާންޑް ސެންޓަރުތަކަށް ގެންގޮސް ފަރުވާދޭން ފަށަން ސަރުކާރުން ނިންމައިފިއެވެ.

މިކަން ހާމަކޮށްފައި ވަނީ ހޯމްލޭންޑް މިނިސްޓަރު އަލީ އިހުސާން، ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައެވެ.

މިނިސްޓަރު އިހުސާން ވިދާޅުވި ގޮތުގައި، މިއަދު ހަވީރުން ފެށިގެން މި މަސައްކަތް ފަށާނެއެވެ. އެންމެ އިސްކަމެއް ދޭނީ ބާޒާރުމަތީ ސަރަހައްދުގައި އުޅޭ މީހުންނަށެވެ. މި ފަރާތްތައް ރިމާންޑް ސެންޓަރަށް ގެންގޮސް، އެ މީހުންނަށް ބޭނުންވާ ފަރުވާ ދިނުމަށާއި، ކަމާގުޅޭ އިދާރާތަކާ ގުޅިގެން އެ މީހުން މަގުމަތިވެފައިވާ ސަބަބުތައް ދެނެގަނެ، އެކަން ހައްލުކުރުމުގެ މަސައްކަތްތައް ކުރާނެ ކަމަށް އޭނާ ވިދާޅުވިއެވެ.

މި ރިމާންޑް ސެންޓަރަކީ މަސްތުވާތަކެތީގެ ޤާނޫނުގެ ދަށުން ޤާއިމްކުރަން ޖެހޭ ސެންޓަރެކެވެ. ކުރީގެ ރައީސް އިބްރާހިމް މުޙައްމަދު ޞާލިޙްގެ ސަރުކާރުގައި ކ. ހިންމަފުށީގައި މި ސެންޓަރު ހެދުމަށްފަހު، ވަކި ހިސާބަކުން އޭގެ ހިންގުން ހުއްޓިފައި އޮތެވެ. ނަމަވެސް މިދިޔަ ޖޫން 15 ގައި މި ސެންޓަރު އަލުން ބޭނުންކުރަން ފަށާފައިވެއެވެ.

ފުލުހުންގެ ކުރީގެ ތަރުޖަމާނު، އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝިފާން ވިދާޅުވެފައިވަނީ، ޖޫން 15 އިން 21 އާ ދެމެދު ހަތް މީހަކު މި ސެންޓަރުގައި ބަންދުކޮށްފައިވާ ކަމަށެވެ. މި ސެންޓަރު ހިންގަނީ ފުލުހުން ސެކިއުރިޓީ ބަލަހައްޓާ ގޮތަށް ނޭޝަނަލް ޑްރަގް އެޖެންސީ (އެންޑީއޭ) އިންނެވެ.

މަސްތުވާތަކެއްޗާ ބެހޭ ޤާނޫނުގެ ދަށުން، މި ސެންޓަރުގެ މައިގަނޑު މަޤްޞަދަކީ މަސްތުވާތަކެތި ބޭނުންކުރުމާއި ޕެޑެލްކުރުމުގެ ކުށުގެ ތުހުމަތުގައި ހައްޔަރުކުރާ މީހުންނަށް، ބަންދުގެ މުއްދަތުގައި އަސާސީ ފަރުވާ ދިނުމެވެ. މި ފިޔަވަޅަކީ މަސްތުވާތަކެތީގެ ވަބާއިން ޒުވާނުން ސަލާމަތްކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.