އަހަރެއްހާ ދުވަހުގެ މެދުކެނޑުމަކަށްފަހު ނޭމާ އަނބުރާ ދަނޑަށް

ބްރެޒިލްގެ ފުޓްބޯޅަ ތަރި ނޭމާ

ބްރެޒިލްގެ ފުޓްބޯޅަ ތަރި ނޭމާ، އަހަރެއްހާ ދުވަހުގެ މެދުކެނޑުމަކަށްފަހު އަނބުރާ ދަނޑަށް ނުކުމެ، އަލް ހިލާލްގެ ޖާޒީގައި ފުރަތަމަ މެޗު ކުޅެފިއެވެ.

އޭއެފްސީ ޗެމްޕިއަންސް ލީގުގައި އަލް ހިލާލް އާއި އަލް އައިން ބައްދަލުކުރި މެޗުގައި ނޭމާ ކުޅެން އެރީ ބަދަލު ކުޅުންތެރިއތެރިއެއްގެ ގޮތުގައެވެ. އަލް ހިލާލް 5-4 އިން މޮޅުވި މި މެޗުގައި ނޭމާއަށް ލަނޑެއް ޖެހުމުގެ ފުރުސަތު ލިބުނު ނަމަވެސް، އެ ފުރުސަތު ބޭނުމެއް ނުކުރެވުނެވެ.

މެޗަށްފަހު ނޭމާ ބުނީ އަނބުރާ ދަނޑަށް ނުކުމެވުނު ކަމުން ވަރަށް ބޮޑު އުފަލެއް ލިބުނު ކަމަށެވެ. އޭނާ ބުނީ ދަނޑުން ބޭރުގައި ހޭދަކުރަން ޖެހުނީ ވަރަށް އުނދަގޫ މުއްދަތެއް ކަމަށާއި، ޓީމުގެ އެހީތެރިކަން ވަރަށް ރަނގަޅު ކަމަށެވެ.

ނޭމާ އެންމެ ފަހުން މެޗެއް ކުޅެފައިވަނީ މިދިޔަ އަހަރުގެ އޮކްޓޯބަރު 17 ގައި ބްރެޒިލް އަށް ކުޅެދިން މެޗެއްގައެވެ. އެ މެޗުގައި އޭނާގެ ކަކުލަށް ލިބުނު އަނިޔާއަކާ ހެދި ބޭސްފަރުވާ ކުރަން ޖެހުނެވެ.

މިދިޔަ އަހަރު ޕީއެސްޖީ ދޫކޮށް އަލް ހިލާލްއާ ގުޅުނު ނޭމާގެ ކޮންޓްރެކްޓްގެ ޖުމްލަ އަގަކީ 400 މިލިއަން ޑޮލަރެވެ. މި ކޮންޓްރެކްޓް އަންނަ އަހަރުގެ ނިޔަލަށް ހަމަވާނެއެވެ.

ސައުދީ ލީގު