އިސްރާއީލުން އީރާނަށް ދިން ހަމަލާއަށް އެމެރިކާއިން ދާއީދުކުރާކަމުގެ އިޝާރާތެއް ބައިޑެން ދެއްވި – އީރާން

ޔުނައިޓެޑް ނޭޝަން ( 22 އޮކްޓޫބަރު 2024)؛ އީރާނާ ދެކޮޅަށް އިސްރާއީލުން ހިންގާ ގާނޫނާ ހިލާފު އަސްކަރީ ހަމަލާތަކަށް އެމެރިކާގެ ރައީސް ޖޯ ބައިޑަން ސިއްރުން ރުހުން ދެއްވައި، ތާއީދު ކުރައްވާނެ ކަމުގެ އިޝާރާތެއް ބައިޑަން ދެއްވާފައިވާ ކަމަށް އީރާނުން އދއަށް ކަނޑައަޅުއްވާފައި ހުންނަ މިޝަނުން ވިދާޅުވެއްޖެއެވެ. އެ މި ޝަނުން އެހެން ވިދާޅުވީ މިދިޔަ ހަފުތާގައި ޖަރުމަނުވިލާތުގައި ބައިޑަން ދެއްކެވި ވާހަކަތަކަށް ހަވާލާދެއްވައި ސަލާމަތީ މަޖިލީހަށް ފޮނުއްވި ސިޓީއެއްގައެވެ.

"އިސްރާއީލުން އީރާނާ ދެކޮޅަށް ހިންގާ ކޮންމެ ހަރުކަށި އަމަލަކަށް ހިތްވަރުދީ، އެކަމަށް މަގުފަހިކޮށްދިނުމުގައި އެމެރިކާއިން އަދާކުރާ ދައުރުގެ ފުރިހަމަ ޒިންމާ އެމެރިކާއިން އުފުލަންޖެހޭނެ.  އަދި ސަރަހައްދީ އަދި ބައިނަލްއަގްވާމީ ސުލްހައާއި ސަލާމަތަށް ކުރިމަތިވެދާނެ ނުރައްކާތަކާއި ގެއްލުންތަކަށް ވެސް އެމެރިކާއިން ޒިންމާ އުފުލަން ޖެހޭނެ" އީރާނުގެ އދގެ މިޝަނުން އދގެ ސަލާމަތީ މަޖިލީހަށް ފޮނުވި ސިޓީގައި ބުނެފައިވެ އެވެ.

ބާލިންއަށް ކުރައްވަމުން ގެންދަވާ ދަތުރުފުޅުގައި ބައިޑަން ނޫސްވެރިންނާ ވާހަކަ ދައްކަވަމުން ވިދާޅުވީ އީރާނުން ދޭ މިސައިލް ހަމަލާތަކަށް އިޒްރޭލުން ރައްދު ދޭނީ ކިހިނެއް އަދި ކޮން އިރަކުކަން ވެސް އެނގިވަޑައިގަންނަވާ ކަމަށެވެ. ނަމަވެސް އެކަމުގެ ތަފްސީލްދެއްވަން އޭނާ ދެކޮޅު ހެއްދެވިއެވެ.

ތެލްއަވީވް އާއި ތެހެރާނާ ދެމެދު ބަޑީގެ ހަމަލާތައް ބަދަލުކުރުން މި އަހަރު އިތުރުވެފައި ވަނީ މިދިޔަ އޭޕްރީލް މަހުގެ އެއްވަނަ ދުވަހު އިސްރާއީލުން ސީރިއާގައި ހުންނަ އީރާނުގެ އެމްބަސީއަށް ބޮން އަޅައި އަސްކަރިއްޔާގެ އިސް އޮފިޝަލުން ޝަހީދުކޮށްލުމާ ގުޅިގެންނެވެ. އޭގެ ދެ ހަފުތާ ފަހުން އީރާނުން އެ ހަމަލާއަށް ރައްދު ދިނީ، އިސްރާއީލުގެ އަސްކަރީ އެތައް މަރުކަޒުތަކަކަށް އެތައް ސަތޭކަ ޑްރޯނާއި ބެލިސްޓިކް މިސައިލްތަކެއް ފޮނުވާލައިގެންނެވެ.