އެޗުޑީސީއަށް ދައްކަންޖެހޭ ފައިސާ ނުދައްކާ ފަރާތްތަކުގެ ނަން އާންމުކުރަން ނިންމައިފި

ހައުސިންގ ޑިވެލޮޕްމަންޓް ކޯޕަރޭޝަން (އެޗުޑީސީ) އަށް އެކި ވިޔަފާރިތަކުން ދައްކަންޖެހި ނުދައްކާހުރި ފައިސާ ދެއްކުމަށް ސުންގަޑިއެއް ކަނޑައަޅައި، އެ މުއްދަތުގެ ކުރިން ފައިސާ ނުދައްކައިފިނަމަ އެ ފަރާތްތަކުގެ ނަން އާންމުކުރަން ނިންމައިފި އެވެ.

އެޗުޑީސީއިން މިއަދު ނެރުނު ނޫސްބަޔާނެއްގައި ބުނެފައިވަނީ މިއީ އެ ކުންފުނީގެ ހިންގުން ހަރުދަނާކުރުމަށް ހާއްސަ އިސްކަމެއް ދީގެން ކުރާ މަސައްކަތްތަކުގެ ތެރެއިން އަޅާ ފިޔަވަޅެއް ކަމަށެވެ.

އެޗުޑީސީއިން ވިޔަފާރި އުސޫލުން ދެމުން އަންނަ ހިދުމަތްތަކާއި ދޫކޮށްފައިވާ ތަންތަން އަދި ތަރައްގީކުރާ ތަންތަނަށް ފައިސާ ދައްކަން ޖެހި ނުދައްކާ ހުރި ވިޔަފާރިތަކަށް އެ ފައިސާ ދައްކައި ހަލާސްކުރުމަށް ދީފައިވާ ސުންގަޑިއަކީ 30 ނޮވެމްބަރު 2024 އެވެ.

"ދެންނެވުނު މުއްދަތުގެ ތެރޭގައި ފައިސާ ދެއްކުމަށް އުޒުރުވެރިވާ ފަރާތްތަކަށް އިތުރު ނޯޓިހެއް ދިނުމަށްފަހު އެ ފަރާތްތަކުގެ މައުލޫމާތާއި މި ކޯޕަރޭޝަނަށް ދައްކަންޖެހޭ ފައިސާގެ ތަފުސީލުތައް މި ކޯޕަރޭޝަންގެ ވެބްސައިޓުގައި ޝާއިއުކުރެވޭނެ" އެޗުޑީސީގެ ބަޔާނުގައި ބުނެފައިވެއެވެ.

އެޗުޑީސީއަށް ދައްކަންޖެހޭ ފައިސާ ދެއްކުމާއި އެކަމާ ގުޅޭ އިތުރު މައުލޫމާތު ސާފުކުރުމަށް recovery@hdc.mv އީމެއިލް އެޑްރެހަށް މެއިލްކުރުމަށް އެ ކުންފުނިން އަންގާފައިވެއެވެ.