ރާއްޖޭގެ ދަރަނީގެ މައްސަލަ: ސެންޓަވިއު އެއްބަސްވުން އުވާލައިފި

ރާއްޖޭގެ ދަރަނީގެ މައްސަލަތަކާ ބެހޭ ގޮތުން ލަފާ އާއި އިރުޝާދު ހޯދުމަށް ކަނޑައެޅި އެމެރިކާގެ ސެންޓަވިއު ޕާޓްނަރުންނާ އެކު ހެދި އެއްބަސްވުން ރާއްޖޭން އުވާލައިފި އެވެ.

ސަރުކާރުގެ އޮފިޝަލަކު ވިދާޅުވި ގޮތުގައި، ސެންޓަވިއުއާ އެކު އެއްބަސްވުން ހެދީ މަހަކު 55،000 ޑޮލަރު (848،100ރ.) ދައްކަން ޖެހޭ ގޮތަށެވެ. އެ އެއްބަސްވުން އުވާލީ، ދައުލަތުގެ ހަރަދު ކުޑަކުރުމަށް ފިނޭންސް މިނިސްޓަރު މޫސާ ޒަމީރު އަޅުއްވަމުން ގެންދަވާ ފިޔަވަޅުތަކުގެ ދަށުންނެވެ.

"އެއީ ޑޮލަރުން ދައްކަން ޖެހޭ ބޮޑު އަދަދެއްގެ ފައިސާ ކަމަށް ވާތީ، މި ވަގުތު ކުރިމަތިވެފައިވާ ދަތިތަކުން އަރައިގަތުމަށް، ރައީސް މުހައްމަދު މުއިއްޒުއާ އެކު ވެސް މަޝްވަރާ ކުރެއްވުމަށް ފަހު ނިންމެވި ނިންމެވުމެއް،" އެ އޮފިޝަލް ވިދާޅުވި އެވެ.

ރާއްޖޭން އަމަލު ކުރަމުން އަންނަނީ، ސަރުކާރުގެ އޮފިޝަލް ވިދާޅުވި ގޮތުގައި، ދޭދޭ ގައުމުތަކާ އެކު މަޝްވަރާކޮށް، ދަރަނި ދެއްކުމުގައި ލުއި ގޮތްތަކެއް ހޯދުމަށެވެ.

ރާއްޖޭގެ ދަރަނީގެ ހާލަތު ކަންބޮޑުވާ މިންވަރަށް ގޮސްފައިވާ ކަމަށް ބެލެވެއެވެ. ވޯލްޑް ބޭންކުގެ ތަފާސްހިސާބުތަކުން ދައްކާ ގޮތުގައި ރާއްޖޭގެ ދަރަންޏާއި ދައުލަތުން ސޮވެރިން ގެރެންޓީ ދީފައިވާ ދަރަނީގެ ޖުމުލަ 8.2 ބިލިއަން ޑޮލަރަށް އަރައެވެ. މިއީ ރާއްޖޭގެ އުފެއްދުންތެރިކަމުގެ ނިސްބަތުން 116 އިންސައްތައާ އެއްވަރުގެ އަދަދެކެވެ.

ފާއިތުވި ހަފުތާތަކުގައި ޗައިނާ އާއި އިންޑިއާ އިން ވަނީ ރާއްޖެއަށް އެހީތެރިކަން ފޯރުކޮށްދީފައެވެ. ޗައިނާއިން ވަނީ މިދިޔަ މަހު ރާއްޖެއާ އެކު މާލީ އެހީތެރިކަމުގެ އެއްބަސްވުމެއްގައި ސޮއިކޮށްފައެވެ. އަދި އިންޑިއާ އިން މިދިޔަ މަހު ވަނީ ރާއްޖޭގެ 50 މިލިއަން ޑޮލަރުގެ ޓްރެޝަރީ ބިލް ފަސްކޮށްދީ، މި މަހު 750 މިލިއަން ޑޮލަރަށް ވުރެ ބޮޑު އަދަދެއްގެ ކަރަންސީ ސްވޮޕް އެއްބަސްވުންތަކެއްގައި ރާއްޖެއާ އެކު ސޮއިކޮށްފައެވެ.