ލިވަޕޫލް އެއްވަނާގައި ހިފަހައްޓަމުންދާ މަޤާމު ދަމަހައްޓައިފި

ލިވަޕޫލުން އިނގިރޭސި ޕްރިމިއަރ ލީގުގެ ތާވަލްގެ އެއްވަނާގައި ހިފަހައްޓަމުންދާ މަޤާމު ދަމަހައްޓައިފިއެވެ.

އެޓީމުން އެއްވަނަ މަޤާމު ކަށަވަރުކޮށްފައި މިވަނީ  ރޭ އަމިއްލަ ދަނޑު އެންފީލްޑްގައި ކުޅުނު މެޗުގައި ޗެލްސީ 2-1 އިން ބަލިކުރުމަށް ފަހުގައެވެ.

ރޭގެ މެޗުގައި ލިވަޕޫލްގެ މިސްރުގެ ތަރި މުހައްމަދު ސަލާހުވަނީ ޕެނަލްޓީއަކުން އެޓީމުގެ ފުރަތަމަ ލަނޑު ކާމިޔާބު ކޮށްދިނުމުގެ އިތުރުން، އެޓީމު މޮޅުވި ލަނޑު ޖެހުމަށް އެހީތެރިވެދީފައެވެ.  މެޗުގެ ފުރަތަމަ ލަނޑު 29 ވަނަ މިނިޓްގައި ލިބުނު ޕެނަލްޓީއަކުން ޖެހީ ސަލާހެވެ.

ފަހު ހާފު ފެށުމާއެކު ޗެލްސީގެ ނިކޮލަސް ޖެކްސަން މެޗު އެއްވަރުކުރި ނަމަވެސް، 51 ވަނަ މިނިޓްގައި ސަލާހުގެ ހިތްގައިމު ޕާހަކުން ކާޓިސް ޖޯނެސް ވަނީ ލަނޑެއް ޖަހާ ލިވަޕޫލަށް ލީޑު ހޯދައި ދީފައެވެ. އަދި މި މެޗު ނިމިގެން ގޮސްފައި ވަނީވެސް 2-1 ން ލިވަޕޫލު މޮޅުވެގެންނެވެ.

މި މެޗުގެ ކުރިން ޗެމްޕިއަން މެންޗެސްޓަ ސިޓީ ވަނީ ވުލްވްސް ދަނޑުގައި 1-1 އިން އެއްވަރުވާން ދަނިކޮށް ފަހު ސިކުންތުކޮޅުގައި 2-1 އިން މޮޅުވެ މެޗު ކާމިޔާބުކޮށްފައެވެ. މި ދެ މެޗުގެ ނަތީޖާއާ އެކު ލިވަޕޫލް އެއްވަނާގައި އޮތީ 21 ޕޮއިންޓް ލިބިގެންނެވެ. ސިޓީއަށް 20 ޕޮއިންޓެވެ.

އަންނަ ހަފުތާގައި ލިވަޕޫލަށް ޖެހޭނީ އާސެނަލުގެ ދަނޑުގައި އާސެނަލް އާއި ކުޅޭށެވެ. މިއީ ތާވަލްގެ ކުރީގައި އޮވެ ތަފާތު ބޮޑުކުރުމަށް ލިވަޕޫލަށް ލިބޭނެ މުހިންމު ފުރުސަތެކެވެ. އަދި އަނެއްކޮޅުން 17 ޕޮއިންޓްގައި އޮތް އާސެނަލްއަށް މިއީ ލިވަޕޫލަށް ވުރެ މާ ބޮޑަށް ފަހަތަށް ދިޔަ ނުދިނުމަށް ވަރަށް މުހިއްމު މެޗަކަށް ވެސް ވެގެން ދާނެއެވެ.