ރާއްޖޭގައި އިންޑިއާގެ ޔޫޕީއައި ތައާރަފުކުރުމަށް ރައީސް މުއިއްޒު ނިންމަވައިފި

އިންޑިއާގެ ޔުނިފައިޑް ޕޭމަންޓް އިންޓަފޭސް (ޔޫޕީއައި) ރާއްޖެއަށް ތައާރުފުކުރުމަށްޓަކައި ކުރަން ޖެހޭ ކަންކަން ކުރިއަށްގެންދިއުމަށް ރައީސް މުހައްމަދު މުއިއްޒު މިއަދު ނިންމަވައިފި އެވެ.

މިގޮތަށް ނިންމަވާފައި ވަނީ މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި އިކޮނޮމިކް މިނިސްޓްރީން ހުށަހެޅި ކަރުދާހަށް މަޝްވަރާކުރެއްވުމަށް ފަހުއެވެ.

ރައީސް އޮފީހުން ނެރުނު ބަޔާނެއްގައި ބުނެފައިވާ ގޮތުގައި، ރައީސް ނިންމަވާފައިވަނީ ޔޫޕީއައި ތައާރަފުކުރުމަށް ކޮންސޯޓިއަމެއް ގާއިމުކުރެއްވުމަށެވެ. މި ކޮންސޯޓިއަމްގައި ރާއްޖޭގެ ބޭންކުތަކާއި މުއާސަލާތީ ކުންފުނިތަކާއި ސަރުކާރުގެ ކުންފުނިތައް އަދި ރާއްޖޭގައި ހަރަކާތްތެރިވާ ފިންޓެކް ކުންފުނިތައް ހިމެނުމަށް ރައީސް ކަނޑައަޅުއްވާފައިވެއެވެ. މި ކޮންސޯޓިއަމް ލީޑް ކުރާނެ އޭޖެންސީއަކަށް ރައީސް ހަމަޖައްސަވާފައިވަނީ ޓްރޭޑްނެޓް މޯލްޑިވްސް ކޯޕަރޭޝަނެވެ.

މީގެ އިތުރުން، ޔޫޕީއައި ގާއިމުކުރުމުގެ މަސައްކަތް ވިލަރެސްކުރުމަށް އިންޓަ އޭޖެންސީ ކޯޑިނޭޝަން ޓީމެއް އެކުލަވާލުމަށް ވެސް ރައީސް ނިންމަވާފައިވެއެވެ. މި ޓީމުގައި އިކޮނޮމިކް މިނިސްޓްރީ، ފިނޭންސް މިނިސްޓްރީ، ހޯމްލޭންޑް މިނިސްޓްރީ އަދި މޯލްޑިވްސް މަނިޓަރީ އޮތޯރިޓީ ހިމެނޭއިރު، އެންމެ އިސްދައުރެއް އަދާކުރާނީ އިކޮނޮމިކް މިނިސްޓްރީންނެވެ.

ރާއްޖޭގެ ޑިޖިޓަލް ޕޭމަންޓު ސިސްޓަމް ތަރައްގީ ކުރުމަށް ކުރާ މަސައްކަތުގެ ދަށުން އިންޑިއާގެ ޔޫޕީއައި ހިދުމަތް ފޯރުކޮށްދޭ ކުންފުންޏާ އެކު މިދިޔަ އޮގަސްޓުގައި ވަނީ އެމްއޯޔޫއެއްގައި ސޮއިކޮށްފައެވެ. މި ހިދުމަތުގެ ދަށުން ފަސޭހަކަމާ އެކު، އެކި ބޭންކުތަކުގައި ހުޅުވާފައިވާ އެކައުންޓުތައް މެދުވެރިކޮށް ވަގުތުން މޮބައިލް ފޯނު ބޭނުންކޮށްގެން ފައިސާ ފޮނުވާ ހެދޭނެއެވެ.