އާމްދަނީ އިތުރުކުރުމަށް އިތުރު ބިލެއް ހުށަހެޅުމުގެ ވިސްނުމެއް ނެތް: ބަންޑާރަ ނައިބު

ދައުލަތުގެ އާމްދަނީ އިތުރުކުރުމަށް އިތުރު ބިލެއް ހުށަހެޅުމުގެ ވިސްނުމެއް ނެތްކަމަށް ދައުލަތުގެ ބަންޑާރަ ނައިބު އަޙްމަދު އުޝާމް ވިދާޅުވެއްޖެއެވެ.

ރައީސް އޮފީހުގައި އިއްޔެ ބޭއްވުނު ނޫސްވެރިންގެ ބައްދަލުވުމުގައި ބަންޑާރަ ނައިބު އަޙްމަދު އުޝާމް ވިދާޅުވީ އާމްދަނީ އިތުރު ކުރުމަށް ރައްޔިތުންގެ މަޖިލީހަށް ހުށަހަޅަން އޮތް ބިލުތައް މިވަގުތަށް ވަނީ ހުށަހަޅައި ނިމިފައި ކަމަށެވެ.

މިދިޔަ ހަފްތާގައި ސަރުކާރުން ވަނީ ޓޫރިޒަމް ދާއިރާއިން ނެގޭ ތިން ބާވަތެއްގެ ޓެކްސް ބޮޑު ކުރުމަށް ތިން ގާނޫނަކަށް އިސްލާހު ގެނައުމަށް މަޖިލީހަށް ހުށަހަޅާފައެވެ. މިގޮތުން ހުށަހެޅި ބިލުތަކުގައި ހިމެނެނީ އެއާޕޯޓު ޑިވެލޮޕްމަންޓް ފީ، ގްރީން ޓެކްސް އަދި ޓީޖީއެސްޓީ ބޮޑުކުރުމެވެ.

އުޝާމް ވިދާޅުވި ގޮތުގައި މިވަގުތަށް އާމްދަނީ އިތުރު ކުރުމަށް ހުށަހަޅަން ގަސްތުކުރާ ހުރިހާ ބިލުތަކެއް ވަނީ ހުށަހެޅިފައެވެ. ނަމަވެސް އިތުރު މަޝްވަރާތަކަށްފަހު، އިތުރު ގާނޫނަކަށް އިސްލާހެއް ހުށަހަޅަން ޖެހިއްޖެނަމަ، މަޖިލީހުގެ މިއަހަރުގެ މި ހިނގާ ތިން ވަނަ ދައުރު ތެރޭގައި އެކަން ކުރާނެ ކަމަށް އެމަނިކުފާނު ވިދާޅުވިއެވެ.

އަންނަ މަހު ތެރޭގައި 2024 ވަނަ އަހަރަށް ލަފާކޮށް މަޖިލީހަށް ހުށަހަޅާ ބަޖެޓުގެ މަސައްކަތް ކުރިއަށްދާއިރު، އިތުރު ގާނޫނަކަށް އިސްލާހު ހުށަހަޅަން ޖެހޭ ނަމަ، މަޖިލީހުގެ މިދައުރު ނިމުމުގެ ކުރިން އެކަން ކުރާނެ ކަމަށްވެސް ބަންޑާރަ ނައިބު އިތުރަށް ވިދާޅުވިއެވެ. މަޖިލީހުގެ މި ދައުރު ނިމޭނީ އަންނަ މަހުގެ ނިޔަލަށެވެ. އަދި 2024 ވަނަ އަހަރުގެ ބަޖެޓު މި މަސް ނިމުމުގެ ކުރިން މަޖިލީހަށް ހުށަހަޅަން ޖެހޭނެއެވެ.