ހިޒްބުﷲ އިން އިސްރާއީލުގެ ބޮޑުވަޒީރުގެ ގެއަށް ހަމަލާދީފި

ބެންޖަމިން ނަތަންޔާހޫ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ ގެއަށް ލުބްނާނުގެ ހިޒްބުﷲ ޖަމާއަތުން ވަރުގަދަ ހަމަލާއެއް ދީފިއެވެ.

އިސްރާއީލުގެ ރަސްމީ ފަރާތްތަކުން މި ހަމަލާ ދިންކަން ކަށަވަރުކޮށްދީފައިވާ އިރު، ބޮޑުވަޒީރުގެ އޮފީހުން ނެރުނު ބަޔާނެއްގައި ބުނެފައިވަނީ، ގީސާރިޔާ ސަރަހައްދުގައި ހުންނަ ނަތަންޔާހޫގެ ގެއަށް ހިޒްބުﷲއިން ހަމަލާދިނީ މިހާތަނަށް އެޖަމާއަތުން ބޭނުންކޮށްފައި ނުވާވަރުގެ ބާރުގަދަ ޑްރޯނަކުން ކަމަށެވެ. މި ހަމަލާއާއެކު ބާރުގަދަ ގޮވުމެއް އިވި، ނަތަންޔާހޫގެ ގެ ވަނީ ހަލާކުވެފައެވެ.

އިސްރާއީލުގެ ވައިގެ ދިފާއީ ނިޒާމުތައް ނާކާމިޔާބުވި ގޮތް ބަލައި ތަހުގީގު ކުރުމުގެ މަސައްކަތް ވަނީ ފަށާފައެވެ. ނަމަވެސް ހަމަލާދިން އިރު ނަތަންޔާހޫއާއި އޭނާގެ އަންހެނުން ގޭގައި ނެތްކަމަށް އިސްރާއީލުގެ ޗެނަލް 12 އިން ބުނެފައިވެއެވެ. ހިޒްބުﷲގެ ބޭނުމަކީ ނަތަންޔާހޫއަށް ވަރުގަދަ އިންޒާރެއް ދިނުން ކަމަށް މުރާސިލުން ބުނެއެވެ. އަދި ނަތަންޔާހޫއާއި އިސްރާއީލުގެ އިސް އޮފިޝަލުން މަރާލުމުގެ އޮޕަރޭޝަންތައް ހިޒްބުﷲގެ ސްޓްރެޓީޖިކް ލިސްޓުގައި ހިމަނާފައިވާކަމަށް ބައެއް ރިޕޯޓްތަކުގައި ބުނެއެވެ.

މި ހަމަލާއާ ގުޅިގެން އިސްރާއީލުގެ ގިނަ ބަޔަކު ބިންގަރާސްތަކަށް ވަންނަމުންދާ ކަމަށާއި، ރޭވެސް ހިޒްބުﷲގެ އެތައް މިސައިލަކާއި ރޮކެޓެއް އިސްރާއީލުގެ އެކި ސަރަހައްދުތަކަށް އަމާޒުކޮށްފައިވާކަމަށް ވަނީ ރިޕޯޓުކޮށްފައެވެ. މި ހަމަލާއަކީ ހަމާސްގެ ލީޑަރު ޔަހްޔާ އައްސިންވާރު ޝަހީދުވިކަން އިސްރާއީލުން އިއުލާނުކުރުމާ ގުޅިގެން ދިން ހަމަލާއެއް ކަމަށް ބެލެވެއެވެ.

ހިޒްބުﷲ އިސްރާޢީލް