ދައުލަތުގެ ބީލަންތަކުގައި މަކަރުހަދާ ފަރާތްތަކަށް ފިޔަވަޅު އެޅޭނެ އައު އުސޫލެއް ތަޢާރަފުކޮށްފި

ފިނޭންސް މިނިސްޓްރީ

ދައުލަތުގެ ބީލަންތަކުގައި މަކަރުހަދާ ފަރާތްތަކާމެދު ފިޔަވަޅު އެޅުމަށް އައު އުސޫލެއް ފިނޭންސް މިނިސްޓްރީން މިދިޔަ ބުދަ ދުވަހު އެކުލަވާލައި ގެޒެޓްކޮށްފިއެވެ.

މި އުސޫލުގެ ދަށުން، ބީލަންތައް ކާމިޔާބުކުރުމުގައި މަކަރުހެދުމާއި މަސައްކަތާ ހަވާލުވުމަށްފަހު މަސައްކަތް ނުކުރުން ފަދަ ކަންކަން ކުރާ ފަރާތްތަކާމެދު ޖޫރިމަނާކުރުމާއި ސަސްޕެންޑްކުރުމުގެ ފިޔަވަޅު އެޅޭނެއެވެ.

އުސޫލާ ޚިލާފުވާ ފަރާތްތަކުގެ މައްސަލަ ބަލައި، ޖޫރިމަނާކޮށް ސަސްޕެންޑްކުރާނީ ފިނޭންސް މިނިސްޓްރީގެ 'ޕްރޮކިއުމަންޓް އެޕީލް ބޯޑު' އިންނެވެ. ފުރަތަމަ މައްސަލައެއްނަމަ، މައްސަލައިގެ ކުޑަބޮޑުމިނަށް ބެލުމަށްފަހު، ބީލަމުގެ ޖުމުލަ އަގުގެ %2.5 އިން ޖޫރިމަނާކުރެވިދާނެއެވެ. ޖޫރިމަނާވި ފަރާތަށް ދައުލަތުން ހުޅުވާ އިތުރު ބީލަމެއްގައި ބައިވެރިވެވޭނީ އެ ޖޫރިމަނާއެއް ދައްކައި ހަލާސްކުރުމަށްފަހުގައެވެ.

ސަސްޕެންޝަނާ ގުޅޭގޮތުން، ފުރަތަމަ ފަހަރު 3 މަހާއި 1 އަހަރާ ދެމެދުގެ މުއްދަތަކަށް، ދެވަނަ ފަހަރު 2-3 އަހަރާ ދެމެދުގެ މުއްދަތަކަށް، އަދި އިތުރުވާ ފަހަރުތަކަށް 5 އަހަރުގެ މުއްދަތަކަށް ސަސްޕެންޑްކުރެވިދާނެއެވެ. އަދި ސަސްޕެންޑްކުރާ މައްސަލަތަކުގައި އެއްވެސް ސެކިއުރިޓީއެއް ނަގާފައިވާނަމަ އެ ފައިސާ ހިފެހެއްޓުމުގެ އިޚްތިޔާރުވެސް ލިބިގެންވެއެވެ.

ފިޔަވަޅު އެޅުމުގެ ކުރިން ޖަވާބުދާރީވުމަށް 5 ދުވަހުގެ މުއްދަތެއް ދެވޭނެއެވެ. މި އައު އުސޫލުގެ ސަބަބުން ދައުލަތުގެ ބީލަންތަކުގެ ނަޒާހަތްތެރިކަން އިތުރުވެ، ޚިދުމަތްތަކުގެ ފެންވަރު ރަނގަޅުވާނެ ކަމަށް ބެލެވެއެވެ.

ފިނޭންސް މިނިސްޓްރީ