އިންޑިއާގެ ދެމަފިރިއަކު ގެނައި ދެ ކިލޯގެ ހެރޮއިން ވީއައިއޭއިން ހިފަހައްޓައިފި

ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން އިންޑިއާގެ ދެމަފިރިއަކު ގެނައި ދެ ކިލޯގެ ހެރޮއިން ފެނި، އެ ދެމީހުން ހައްޔަރުކޮށްފިއެވެ.

ކަސްޓަމްސްއިން މިއަދު ހާމަކުރިގޮތުގައި އަތުލައިގަނެފައިވަނީ 2.05 ކިލޯގެ ހެރޮއިންއެވެ. މި ތަކެތި ފެނުނީ މިދިޔަ އަންގާރަ ދުވަހުއެވެ.

ހައްޔަރުކުރެވުނު ދެމީހުންނަކީ 41 އަހަރުގެ މުހައްމަދު ޝޯއިބް އާއި 38 އަހަރުގެ އައިޝާއެވެ. މި ދެމަފިރިން ރާއްޖެ އައިއިރު ގެނައި ލަގެޖުން ކޮންސީލުކޮށްފައިވާ މަސްތުވާތަކެތި ފެނުނުކަމަށް ކޯޓު އަމުރުން އެނގެއެވެ.

މި މައްސަލައިގައި ހައްޔަރުކުރެވުނު ދެމީހުން ތިން ދުވަހަށް ކަސްޓޯޑިއަލް ޖަލެއްގައި ބަންދުކުރުމަށް ކްރިމިނަލް ކޯޓުން ބުދަ ދުވަހު އަމުރުކޮށްފައިވެއެވެ. ބަންދަށް ކުރު މުއްދަތެއް ޖަހާފައިވަނީ ޝަރީއަތް ފެށުމާ ހަމައަށް ވެސް ތަރުޖަމާނަކު ހަމަޖެހިފައި ނުވާތީކަމަށް ކޯޓު އަމުރުގައި ބަޔާންކޮށްފައިވެއެވެ.

މަސްތުވާތަކެތި ރާއްޖެ އެތެރެކުރި ކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކި ގަރީނާ ފުލުހުން ހުށަހަޅާފައިވާކަމަށްވެސް ކޯޓު އަމުރުގައި ފާހަގަކޮށްފައިވެއެވެ. ނަމަވެސް، މި މައްސަލައާ ގުޅޭ އިތުރު ތަފްސީލެއް ކަސްޓަމްސްއިން މިހާތަނަށް ހާމަކޮށްފައެއް ނުވެއެވެ.