ހަމާސްގެ އިސްވެރިޔާ ޔަހުޔާ ސިންވާރު އަވަހާރަކޮށްލައިފިކަން ހަމާސްއިން ކަށަވަރުކޮށްދީފި

ފަލަސްތީނުގެ މިނިވަންކަމަށް މަސައްކަތްކުރާ ހަމާސް ޖަމާއަތުގެ ލީޑަރު ޔަހުޔާ ސިންވާރު އަވަހާރަކޮށްލާފައިވާކަން ހަމާސްއިން ކަށަވަރުކޮށްދީފިއެވެ.

މި ޚަބަރު ހަމާސްގެ ޣައްޒާގެ އިސްވެރިޔާ ޚަލީލް އަލް ހައްޔާ ވަނީ ޓީވީ މެދުވެރިކޮށް އިއުލާނުކޮށްފައެވެ.

އިސްރާއީލުގެ ސަރުކާރާއި އަސްކަރިއްޔާއިން ވެސް ވަނީ ޣައްޒާގައި ހިންގި އޮޕަރޭޝަނެއްގައި ސިންވާރު އަވަހާރަކޮށްލާފައިވާކަން ކަށަވަރުކޮށްދީފައެވެ. އައިޑީއެފުން ދައްކާފައިވާ ޑްރޯން ފުޓޭޖެއްގައި ސިންވާރު ވަރަށް ބޮޑަށް ޒަޚަމްވެފައި އޮންނަ މަންޒަރު ފެނެއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައިވަނީ ހަމާސްގެ ލީޑަރު މަރާލުމަކީ ޣައްޒާއާ ދެކޮޅަށް ކުރާ ހަނގުރާމައިގެ ނިމުމެއް ނޫން ކަމަށާއި، އިސްރާއީލުގެ އަސީރުން އަނބުރާ އަންނަންދެން އަސްކަރިއްޔާ ހަނގުރާމަ ކުރިއަށް ގެންދާނެ ކަމަށެވެ.

މިދިޔަ އަހަރުގެ އޮކްޓޯބަރު 7 ވަނަ ދުވަހުން ފެށިގެން ޣައްޒާއަށް އިސްރާއީލުން ދޭން ފެށި ހަމަލާގައި މިހާތަނަށް 42،438 މީހުން ވަނީ ޝަހީދުކޮށްލާފައެވެ. އަދި 99،246 މީހުން ވަނީ ޒަޚަމްވެފައެވެ. ސިންވާރު އަވަހާރަކޮށްލި ނަމަވެސް ހަމާސްއިން ބުނެފައިވަނީ އެ ޖަމާއަތުން ފަހަތަށް ނުޖެހޭނެ ކަމަށާއި އިތުރަށް ވަރުގަދަވާނެ ކަމަށެވެ.