ދުންފަތާ ދުރު މުޖުތަމަޢެއް ބިނާކުރުމަށް ސަރުކާރުން އައު މާސްޓަރ ޕްލޭނެއް

ދުންފަތުގެ އިސްތިޢުމާލު ކުރުމުގެ މައްސަލައަށް ދާއިމީ ހައްލެއް ހޯދުމަށްޓަކައި ސަރުކާރުން އައު މާސްޓަރ ޕްލޭނެއް އެކުލަވާލަން ނިންމައިފިއެވެ.

މި ނިންމުން ނިންމަވާފައި ވަނީ އިއްޔެ ބޭއްވި ވަޒީރުންގެ މަޖިލީހުގެ ޖަލްސާގައި ކަމަށް ރައީސް އޮފީހުން މަޢުލޫމާތު ދީފައިވެއެވެ.

ކުރިއަށް އޮތް ހަތަރު އަހަރުގެ ތެރޭގައި ދުންފަތް ކޮންޓްރޯލްކުރުމުގައި ފާހަގަކުރެވޭފަދަ ކުރިއެރުމެއް ހޯދުމަށް އަމާޒުކޮށް، ރިއަލިސްޓިކް މާސްޓަރ ޕްލޭނެއް އެކުލަވާލުމަށް ވަނީ ނިންމާފައެވެ. މި ޕްލޭން މި މަހުގެ 27 ވަނަ ދުވަހު އޮންނަ ވަޒީރުންގެ މަޖިލީހުގެ ޖަލްސާއަށް ހުށަހެޅުމަށްވެސް ރައީސް ވަނީ ނިންމަވާފައެވެ.

އައު މާސްޓަރ ޕްލޭނުގައި ހިމެނޭ މުހިންމު ބައެއް ކަންތައްތަކުގެ ތެރޭގައި:

1. ދުންފަތާ ދުރު މުޖުތަމަޢެއް ބިނާކުރުމަށް މަސައްކަތްކުރާ ފަރާތްތަކާއި، ދުންފަތުގެ އިސްތިޢުމާލު ނުކުރާ ރަށްރަށް ފާހަގަކޮށް ޚާއްޞަ އިނާމެއް ތަޢާރަފުކުރުން.

2. އިނާމު ލިބޭ ރަށްތަކުގެ އިޖްތިމާޢީ ކަންކަމަށް މާލީ އެހީތެރިކަން ފޯރުކޮށްދިނުން.

3. ދުންފަތާ ދުރުހެލިވާން ބޭނުންވާ ފަރާތްތަކަށް ޚާއްޞަ ފަރުވާ، ކޮންމެ ރަށެއްގެ ޞިއްޙީ ޚިދުމަތްދޭ މަރުކަޒަކުން ހިލޭ ފޯރުކޮށްދިނުން.

މި މާސްޓަރ ޕްލޭނުގެ ސަބަބުން ދުންފަތުގެ އިސްތިޢުމާލު މަދުކުރުމަށާއި، ދުންފަތުގެ ސަބަބުން ކުރިމަތިވާ ޞިއްޙީ އަދި އިޖްތިމާޢީ މައްސަލަތައް ކުޑަކުރުމަށް އެހީތެރިވެދޭނެ ކަމަށް ބެލެވެއެވެ. އަދި މިއީ ދުންފަތާ ދުރު، ދުޅަހެޔޮ މުޖުތަމަޢެއް ބިނާކުރުމަށް އެޅޭ މުހިންމު ފިޔަވަޅެއް ކަމުގައި ސަރުކާރުން ދެކެއެވެ.

ދުންފަތް ކޮންޓްރޯލްކުރުމަށް ހެދިފައިވާ ޤާނޫނުތައް ތަންފީޒުކުރުމަށްވެސް މި ޕްލޭނުގައި ޚާއްޞަ އަހަންމިއްޔަތުކަމެއް ދޭނެ ކަމަށް ބެލެވެއެވެ. މި މަސައްކަތުގައި ސަރުކާރުގެ އެކި އިދާރާތަކާއި، މަދަނީ ނީ ޖަމްޢިއްޔާތަކާއި، އަމިއްލަ ފަރުދުންގެ ބައިވެރިވުން ހޯދުމަށްވެސް ރޭވިފައިވާ ކަމަށް މަޢުލޫމާތު ލިބިފައިވެއެވެ.