މޫސުމުގެ އަސަރު ދެނެގަތުމަށް އައު ނިޒާމެއް ތަޢާރަފުކުރަނީ

މޫސުން ގޯސްވެ ކުރިމަތިވެދާނެ ހާދިސާތަކުގައި ކުރާނެ އަސަރު ދެނެގަނެވޭނެ 'އިމްޕެކްޓް ބޭސްޑް ވެދަ ފޯކާސްޓް' ނިޒާމެއް ތަޢާރަފުކުރުމުގެ މަސައްކަތް ކުރިއަށްދާ ކަމަށް އެންވަޔަރަމަންޓް މިނިސްޓަރު ތޯރިގު އިބްރާހިމް މިއަދު ހާމަކުރައްވައިފިއެވެ.

މިނިސްޓަރު މިފަދައިން ވިދާޅުވީ ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި އެންވަޔަރަމަންޓް މިނިސްޓްރީން ކުރިއަށްގެންދާ އެކިއެކި މަޝްރޫޢުތަކުގެ މަޢުލޫމާތު އޭނާ ހިއްސާކުރެއްވިއެވެ.

މިނިސްޓަރު ތޯރިގު ވިދާޅުވި ގޮތުގައި، މިހާރު ޤައުމީ މޫސުމާބެހޭ އިދާރާ (މެޓް) އިން ރެކޯޑުކުރަމުންދަނީ ހަމައެކަނި މޫސުން ކުރިއަށް ލަފާކުރާ ގޮތުގެ މަޢުލޫމާތެވެ. ނަމަވެސް، އައު 'އިމްޕެކްޓް ބޭސްޑް ވެދަ ފޯކާސްޓް' ނިޒާމުގެ ސަބަބުން މޫސުން ގޯސްވާ ހާލަތްތަކުގައި ކުރާނެ އަސަރުތައް ފުޅާ ދާއިރާއެއްގައި ކުރިއާލާ ދެނެގަނެވޭނެ ކަމަށް އޭނާ ފާހަގަކުރެއްވިއެވެ.

"މިސާލަކަށް ކޮޅިގަނޑެއް ނުވަތަ ވިލާގަނޑެއް އައުމުން، އޭގެ ސަބަބުން ވަކި ސަރަހައްދަކަށް ކުރާނެ އަސަރުތައް ދެނެގަނެވޭނެ. ފެންބޮޑުވުމާއި، އުދައެރުމާއި، ރާޅުއެރުން ފަދަ ކަންކަން ވާނެތޯ، އަދި މިފަދަ އަސަރުތައް ފޯރާނީ ކޮން ހިސާބަކަށްތޯ، ކޮން ރަށްތަކަކަށްތޯ ބެލޭނެ. މިހާރު އަޅުގަނޑުމެން މަސައްކަތްކުރަމުންދަނީ މި ދިމާލަށް،" މިނިސްޓަރު ތޯރިގު ވިދާޅުވިއެވެ.

މިނިސްޓަރުގެ ވާހަކަފުޅުގައި، މި އައު ނިޒާމު ކުރިއަށް އޮތް 18 މަސްދުވަހުގެ ތެރޭގައި ރާއްޖެއަށް ތަޢާރަފުކުރުމަށް އަމާޒުކުރެވިފައިވާ ކަމަށް ވިދާޅުވިއެވެ. މީގެ އިތުރުން، މޫސުމާ ގުޅޭ އެހެނިހެން މަޝްރޫޢުތަކުގެ ތެރޭގައި ރާޑަރު ނެޓްވޯކް ފުޅާކުރުމާއި، ލައިޓްނިންގ ޑިޓެކްޝަން ނެޓްވޯކެއް ޤާއިމުކުރުމާއި، އޮޓޮމެޓިކް ވެދަ ސްޓޭޝަންތައް މަރާމާތުކޮށް އަޕްގްރޭޑްކުރުން ހިމެނޭކަން މިނިސްޓަރު ފާހަގަކުރެއްވިއެވެ.

މި އައު ނިޒާމުގެ ސަބަބުން، މޫސުމުގެ ނޭދެވޭ އަސަރުތަކުން ރައްޔިތުންނަށާއި އިޤްތިޞާދަށް ކުރިމަތިވެދާނެ ގެއްލުންއްލުންތައް ކުޑަކުރުމަށް އެހީތެރިވެދޭނެ ކަމަށް ބެލެވެއެވެ. އަދި ކާރިސާތަކަށް ތައްޔާރުވުމަށާއި، ކުއްލި ހާލަތްތަކުގައި އަޅަންޖެހޭ ފިޔަވަޅުތައް އަޅަން ފަސޭހަވެގެންދާނެ ކަމަށްވެސް އުންމީދުކުރެވެއެވެ.